O‘zbekistonda kambag‘allikning rasmiy chegarasi belgilandi
“Minimal isteʼmol xarajatlari qiymatini hisoblash tartibini amaliyotga joriy etish to‘g‘risida”gi hukumat qarori qabul qilindi. Bu haqda Adliya vazirligi xabar bermoqda.
Qarorga ko‘ra, minimal isteʼmol xarajatlari ko‘rsatkichidan kambag‘allik mezoni (yoki chegarasi) sifatida foydalaniladi.
2022 yildan boshlab, “Ijtimoiy himoya yagona reyestri” axborot tizimi orqali oilani kam taʼminlangan deb eʼtirof etish jarayonida qo‘llanadigan va jon boshiga to‘g‘ri keladigan bir oylik daromad mezoni minimal isteʼmol xarajatlariga tenglashtiriladi.
Har yili avgust oyigacha minimal isteʼmol xarajatlari qiymatining prognoz parametrlari inflyatsiya kutilmalaridan kelib chiqib hisoblanadi.
Minimal isteʼmol xarajatlari va kambag‘allik darajasi har yilgi hisobot yilida inflyatsiya darajasidan kelib chiqib, keyingi yilning 20 yanvariga qadar eʼlon qilib boriladi.
Minimal isteʼmol xarajatlari tarkibi kamida har 5 yilda qayta ko‘rib chiqiladi.
Qaror bilan aholining minimal isteʼmol xarajatlari qiymati va kambag‘allik chegarasini hisoblash tartibi to‘g‘risidagi nizom tasdiqlandi.
Eslatib o‘tamiz, joriy yilning 31 mayida minimal isteʼmol xarajatlari 440 ming so‘m etib belgilangandi. Bu qiymat ijtimoiy himoyaga muhtoj aholiga moddiy ko‘mak berishda muhim ahamiyatga egaligi taʼkidlangandi.
