Ahmad Maʼsud “Tolibon”ga shart qo‘ydi
Panjsher viloyatida qarshilik fronti rahbari Ahmad Maʼsud toliblarga qarshi kurashni to‘xtatish shartini maʼlum qildi. Bu haqda u “Foreign Policy” jurnaliga bergan intervyuda aytgan.
“Agar ‘Tolibon‘ hammani hokimiyatga jalb qilsa adolat o‘rnatsa, Afg‘onistonda barchaga tenglik va erkinlik bersa, men qurolimni tashlab, siyosatni tark etaman”, - degan Masʼud.
Qo‘mondonning fikricha, toliblar bilan faqat inklyuziv hukumat tuzilsa va markazlashtirilmagan hokimiyat o‘rnatilgan taqdirdagina muzokaralarga kelishish mumkin, qolgan barcha variantlar nomaqbul hisoblanadi. Aks holda Panjsher qarshilik ko‘rsatishda davom etadi.
Masʼud chet eldan hech qanday moliyaviy yordam olmayotganini aytdi. Toliblarni esa, aksincha ko‘plab mintaqa davlatlari qo‘llab-quvvatlamoqda.
“Qochib ketgan G‘ani hukumati ko‘plab davlatlarni ‘Tolibon‘ tarafga o‘tishga majbur qildi. Ularning etnik va diniy siyosatidan tortib suv taʼminotigacha bo‘lgan harakatlari ko‘plab qo‘shnilarni toliblar bilan yaqinlashishga majbur qildi. Bunga yana bir sabab-AQSH qo‘shinlari bo‘ldi”,- degan Panjsher yetakchisi.
15 avgust kuni “Tolibon” tomonidan Kobul egallanib, Afg‘onistonda hokimiyat qo‘lga olinganligi eʼlon qilindi. Hozirda Panjsher viloyatigina harakat tomonidan nazorat qilinmaydi. Panjsherda hozirda etnik tojiklar Ahmad Masʼud boshchiligida “Qarshilik fronti”ni tuzgan. Viloyat Afg‘onistondagi eng kichik va aholisi kam hududlardan sanaladi.
Eslatib o‘tamiz, bundan avval Ahmad Masʼud butun Afg‘oniston uchun kurash olib borayotganini maʼlum qilgan.
Jahongir Qo‘ziyev
