Turkiya Prezidenti mamlakatimiz yetakchisi va barcha o‘zbekistonliklarni Mustaqillik kuni bilan tabrikladi
1 sentyabr kuni O‘zbekiston Respublikasi Prezidenti Shavkat Mirziyoyevning Turkiya Respublikasi Prezidenti Rejep Tayyip Erdog‘an bilan telefon orqali muloqoti bo‘lib o‘tdi.
Suhbat avvalida Turkiya rahbari davlatimiz rahbari va O‘zbekistonning ko‘p millatli xalqini yurtimiz mustaqilligining 30-yilligi bilan samimiy qutladi. Do‘st Turkiya xalqi nomidan O‘zbekistonga tinchlik-osoyishtalik, farovonlik va ravnaq tilaklarini izhor etdi.
Prezidentlar ikki tomonlama hamkorlik kun tartibi yuzasidan fikr almashdilar.
Joriy yil boshidan o‘zaro savdo ko‘rsatkichlari ikki barobar o‘sgani va 240 dan ortiq qo‘shma korxona tashkil etilgani mamnuniyat bilan qayd etildi.
Mamlakatlarimiz yetakchi kompaniyalarining kooperatsiyasi kuchayib bormoqda, jumladan, energetika, sanoat, qishloq xo‘jaligi, infratuzilma, turizm va boshqa sohalarda muhim investitsiya loyihalari amalga oshirilmoqda.
Qo‘shma taʼlim va madaniy-gumanitar dasturlar muvaffaqiyatli joriy qilinmoqda. Xususan, shu yilning avgust oyida turkiyalik yetakchi mutaxassislar Toshkent va Samarqand shaharlaridagi arxitektura-qurilish institutlariga rahbar bo‘ldilar.
Yetakchilar bo‘lajak oliy darajadagi tadbirlar rejasini, shu jumladan Strategik hamkorlik kengashining navbatdagi yig‘ilishiga tayyorgarlik masalalarini ko‘rib chiqdilar.
Afg‘onistondagi harbiy-siyosiy ahvol keskinlashishi taʼsirida mintaqadagi vaziyatning rivojlanishiga alohida eʼtibor qaratildi. Mintaqaviy xavfsizlik va barqarorlikni taʼminlash masalalari yuzasidan aloqalar va ko‘p tomonlama muloqotni davom ettirish muhim ekani taʼkidlandi.
Avvalroq Prezident Shavkat Mirziyoyev 1 sentyabr kuni Birlashgan Arab Amirliklari Vitse-prezidenti, Bosh vaziri, Dubay Amirligi hokimi Muhammad bin Roshid Ol Maktum bilan telefon orqali muloqot qilgani hamda O‘zbekiston Respublikasi mustaqilligining 30 yilligi munosabati bilan Prezident Shavkat Mirziyoyev nomiga xorijiy davlatlar va hukumatlar, nufuzli xalqaro tashkilotlar rahbarlari, taniqli jamoat va din arboblaridan samimiy qutlovlar kelayotgani to‘g‘risida xabar bergandik.
