Yaponiyada Moderna vaksinasidan topilgan yot moddalar zanglamaydigan po‘lat bo‘lib chiqdi
Yaponiyada Amerikaning koronavirusga qarshi Moderna vaksinalaridan topilgan yot modda zanglamaydigan po‘lat zarralari bo‘lib chiqdi. Bu haqda Moderna kompaniyasi va vaksinani mamlakatda tarqatishga maʼsul Yaponiyaning Takeda kompaniyasi qo‘shma bayonotida aytilgan.
Preparat Takeda kompaniyasi tomonidan tekshiruvdan o‘tkazildi. Tekshiruv natijalaridan maʼlum bo‘lishicha, «ishlab chiqarish uskunalarini yig‘ish vaqtidagi nosozlik tufayli zanglamaydigan po‘lat zarralari vaksinaga aralashib ketgan».
Qo‘shma bayonotda taʼkidlanishicha, zanglamaydigan po‘latdan yurak klapanlari, sunʼiy bo‘g‘inlar, metall choklar va biriktiruvchi qisqichda foydalaniladi, shuning uchun uning zarralarini tanaga yuborish katta xavf tug‘dirmaydi.
Ammo, shunga qaramay, Yaponiya Sog‘liqni saqlash vazirligi maʼlumotlariga ko‘ra, ehtiyot chorasi sifatida mamlakatda Moderna vaksinasining bir nechta partiyasini qo‘llash to‘xtatilgan.
Avgust oyining oxirida Yaponiyada Moderna vaksinasi partiyalaridan birida yot moddalar aniqlandi — ochilmagan 39 ta ampulada kattaligi bir necha millimetrdan oshmaydigan qora zarrachalar topilgan. O‘sha vaqtga kelib, yarim milliongacha odam ushbu partiyadagi vaksinalar bilan emlangan bo‘lishi mumkin. Ulardan ikki nafari inyeksiyadan ko‘p o‘tmay vafot etdi, ammo ularning o‘limi bilan emlash o‘rtasida hech qanday bog‘liqlik aniqlanmagan. Shu bilan birga rasmiy tergov davom etmoqda.
Hodisa tufayli Yaponiya Sog‘liqni saqlash vazirligi xavfsizlik yuzasidan mamlakatga Ispaniyaning Rovi SA farmatsevtika kompaniyasi korxonalaridan uchta partiyada kelib tushgan 1,63 million doza Moderna vaksinasidan foydalanishni to‘xtatdi. Uchta partiyaning barchasi bitta ishlab chiqarish liniyasida deyarli bir vaqtning o‘zida tayyorlangan. Yaponiyaga yetkazib berilgach, ular 863 ta vaksinatsiya markaziga tarqatilgan. Yot zarralar topilgani uchun ushbu markazlarga qo‘shimcha dozada vaksinalar yetkaziladi.
