Turkiya hukumati koronavirus tarqalishiga qarshi yangi choralarni joriy etmoqchi
Turkiyaga sayyohlik maqsadida kelgan xorijiy fuqarolar 6 sentyabrdan boshlab mamlakatda joriy qilinadigan yangi cheklovlarga amal qilmaydi. Bu haqda Interfaks xabar qilmoqda.
Turkiya hukumati 6 sentyabrdan koronavirus tarqalishiga qarshi yangi choralarni joriy etmoqda. Xususan, shaharlararo avtobuslar, poyezdlar va boshqa jamoat transportida sayohat qilishda, shuningdek, mamlakat ichidagi samolyotlarda uchishda emlanmagan yo‘lovchilardan PSR testlari sertifikatlari talab qilinadi. Bundan tashqari, bu cheklovlar konsertlar, kinoteatrlar va teatrlarga tashrif buyurishda ham amal qiladi.
Turkiyada doimiy istiqomat qiluvchi (yashash uchun ruxsatnomasi bo‘lgan) chet ellik rezidentlar yangi cheklovlarga rioya qilishlari shart.
Mamlakatda oxirgi kunlarda kuniga o‘rtacha 20 mingga yaqin koronavirus holatlari qayd etilmoqda.
Avvalroq, Turkiya hukumati muhojirlarning yangi oqimini qabul qilmasligi haqida xabar qilgan edik.
Nasiba To'xtayeva
