“Tolibon” nazoratida bo‘lmagan Panjsher ham asta-sekinlik bilan qo‘ldan ketmoqda
“Tolibon” harakati Panjsherning strategik muhim tumani–Xinjni egalladi. Bu haqda harakat vakili Bilol Karimiy xabar bermoqda.
Toliblar hozirga qadar Panjsherning Shutal, Annaba, Paryon va Hinj tumanlarini bosib olgani aytilmoqda. Karimiyning so‘zlariga ko‘ra, “Tolibon” kuchlari Panjsher markaziga qarab harakatni davom ettirmoqda.
Bundan avval ham toliblar Panjsherni to‘la nazoratga olganini xabar qilgan edi. Kobulda g‘oliblik sharafiga havoga o‘q uzish oqtibatida 70 dan ortiq kishi jabrlandi. Ammo bu xabarlar Qarshilik harakati vakillari, jumladan sobiq vitse-prezident Amrulla Solih va Panjsher rasmiy vakili Fahm Dashtiy tomonidan inkor qilindi.
Maʼlumot o‘rnida, “Tolibon” 15 avgust kuni Kobul shahrini jangsiz egallaganidan keyin butun Afg‘onistonda hokimiyat o‘rnatilganini eʼlon qildi. Hozirda faqatgina Panjsher viloyati toliblar tomonidan nazorat qilinmayapti. Bu yerda Ahmad Masʼud va Afg‘onistonning sobiq vitse-prezidenti Amrulla Solih boshchiligida qarshilik fronti tuzilgan.
