"Abu-Saxiy" yaqinida "bita" ko‘tarib janjal qilgan "Kobalt" haydovchisiga tegishli chora ko‘rish ichki ishlar bo‘limiga topshirildi
Ijtimoiy tarmoqda «Ipodromda haydovchi va GAI xodimlari o‘rtasida janjal» sarlavhasi ostida tarqalgan video yuzasidan YHXBB ma’lumot berdi.
Joriy yilning 3-sentyabr kuni soat 21:45 larda KXAY ko‘chasi, «Abu-Sahiy» bozori avtoturargohidan chiqishda «Kobalt» rusumli transport vositasi yo‘lning qatnov qismiga avtoulovini to‘xtatgan vaqtida, shu yerda xizmat olib borayotgan YPX inspektorlari safdor E.Tulanov va safdor S. Ergashevlar tomonidan avtoulovni avtoturargohga qo‘yish lozimligi haqida ogohlantirilganda, 2001-yilda tug‘ilgan haydovchi J. M. avtoulovni haydab ketib, harakatlanish jarayonida o‘z yo‘nalishida o‘zidan oldinda harakatlanib ketayotgan «Spark» avtomashinasi haydovchisi bilan yo‘l talashib qolishi natijada «Kobalt» avtomashinasi haydovchisi avtoulovidan «bita» sport anjomini olib «Spark» avtomashinasi haydovchisi bilan janjallashayotgan vaqtida YPX inspektorlari fuqaro J. M. ni ushlab, o‘ziga va avtouloviga tegishli hujjatlarini taqdim qilishini so‘ragan, lekin haydovchi hujjatlarni YPX inspektorlariga taqdim qilmagan.
Shundan so‘ng fuqaro J.M. Toshkent shahar Chilonzor tuman 5-son IIO FMBga olib borilib, tegishli hujjatlarsiz transport vositasini boshqarganligi uchun O‘zbekiston Respublikasi MJtKning 135-moddasiga asosan ma’muriy bayonnoma rasmiylashtirib, fuqaroga tegishli chora ko‘rish uchun Ichki ishlar bo‘limiga topshirilgan.
