Saudiya Arabistoni sayyohlik kompaniyasi bilan uchrashuv tashkil etildi

 

 

O‘zbekistonning Saudiya Arabistondagi elchisi Ulug‘bek Maqsudov “Vahatal harir” turistik kompaniyasi  rahbari Abdulmajid bin Abdulaziz bilan uchrashdi. Bu haqda “Dunyo” axborot agentligi xabar berdi.

 

Unda ikki mamlakat turizm sohasidagi hamkorlik masalalari muhokama qilingan. Ulug‘bek Maqsudov Abdulmajid bin Abdulazizga   O‘zbekistonda sayyohlik sohasini rivojlantirish, bu yo‘nalishda investitsiya kiritayotgan mahalliy va xorijiy investorlarga yaratilayotgan shart-sharoitlar haqida batafsil maʼlumot berdi. O‘zbekistonning boy tarixiy-madaniy merosi, qadimiy meʼmoriy va arxeologik obidalari, xususan, Samarqand, Buxoro, Xiva, Shahrisabz, Termiz, Qo‘qon va Toshkent shaharlarining turistik imkoniyatlariga alohida eʼtibor qaratildi.

 

Elchi, shuningdek, O‘zbekistonga saudiyalik sayyohlar sonini oshirish  maqsadida O‘zbekistonning Ar-Riyoddagi elchixonasi «Dolores Travel Group» sayyohlik agentligi va Saudiyaning «FlyNas» aviakompaniyasi bilan birgalikda joriy yil 9–16 sentyabr kunlari podshohlikning 12 ta yirik sayyohlik kompaniyalari vakillari uchun Toshkent, Samarqand va Buxoro shaharlariga info-tur tashkil etayotganini maʼlum qilgan.

 

Abdulmajid bin Abdulaziz turizm va investitsiya sohalarida amalga oshirilayotgan beqiyos islohotlarni yuqori baholadi. U, shuningdek, Saudiya Arabistonining “FlyNas” aviakompaniyasi tomonidan “Ar-Riyod-Toshkent-Ar-Riyod” yo‘nalishi bo‘yicha yo‘lga qo‘yilgan to‘g‘ridan-to‘g‘ri aviqatnovlar ikki mamlakatning sayyohlari sonini va o‘zaro savdo hajmini oshishiga xizmat qilishini qayd etgan.

 

Abdulmajid bin Abdulaziz saudiyalik sayyohlarning O‘zbekistonga qiziqishi ortayotganini hisobga olgan holda bu yo‘nalishdagi o‘zaro aloqalarni rivojlantirish bo‘yicha qator takliflarini bildirgan.

 

Avvalroq Saudiya Arabistonidan Toshkentga muntazam reys yo‘lga qo‘yilgani xabar qilingan edi.