Tailandda koronavirusga qarshi namoyishlar bo‘lib o‘tmoqda
Tailandda hukumat ishiga norozilik bildirish maqsadida ommaviy namoyishlar boshlandi. Bu haqda “The New York Times” xabar berdi.
Minglab aholi qo‘chaga chiqqan. Ular hukumatni pandemiyaga qarshi samarasiz kurashda ayblamoqda. Namoyishchilar mamlakat bosh vaziri Prayuta Chan-Ochani isteʼfoga chiqshini talab qilgan. “Tailandliklar amaldagi hukumat ishidan anchadan buyon norozi. Bunga bugungi pandemiya ham yana bir isbot bo‘ldi”, — degan norozilik aksiyasi qatnashchilaridan biri.
Huquqni muhofaza qilish organi xodimlari namoyishchilarga qarata ko‘z yoshlatuvchi gaz ishlatgan. Shuningdek, ularni tarqatishda rezina o‘qidan foydalangan.
Tailandda pandemiyadan 12 ming kishi vafot etgan. Epidemiologik vaziyat mamlakat iqtisodiyotiga katta zarar yetkazgan. Hukumat kasallik tarqalishiga qarshi samarali kurash olib bora olmayapti. Ommaviy emlash jarayoni juda sekinlik bilan kechmoqda.
Tailand aholisi avgust boshida ham hukumatning koronavirusga qarshi olib borayotgan harakatidan noroziligini bildirish maqsadida namoyishlar tashkil etgan edi. O‘shanda bosh vazir qarorgohiga petardalar otilgan. Tartibsizliklar vaqtida kuch ishlatar xodimlar bilan keskin to‘qnashuvlar ro‘y bergan. Rasmiy Bangkok tartib o‘rnatish maqsadida yuzlab politsiya otryadlarini safarbar qilgan.
Bundan avval Yaponiyadagi epidemiologik vaziyat ortidan Tokio Olimpiadasiga qarshi noroziliklar bo‘lib o‘tgan edi.
Jahongir Qo‘ziyev
