O‘zbekistonda dam olish kunlari qanday ob-havo kuzatiladi?
Sentyabr oyining birinchi haftasi davomda saqlanib turgan, havo harorati meʼyordan 2-5 darajaga yuqori bo‘lgan issiq ob-havodan so‘ng, O‘zbekistonga birinchi kuzgi sovuq kirib keldi.
“O‘zgidromet” xabariga ko‘ra, 8 sentyabrda respublika shimoliga antitsiklon kirib kelishi boshlandi, u Volgabo‘yi hududlaridan salqin havo olib keldi. 9 sentyabrda salqin havo massasi O‘zbekistonning barcha hududini qamrab oldi, harorat kechalari 14-17 daraja iliqqacha, shimolda 8-13 daraja iliqqacha, kunduz kunlari 27-32 daraja issiqqacha pasaydi.
Bugun kunduz kuni respublika hududiga sovuq oqim kirib kelishi davom etadi va kunduz kungi harorat 24-27 daraja issiqqacha pasayadi va o‘rtacha ko‘p yillik qiymatlardan 2-4 darajaga past bo‘ladi. Respublikaning katta qismida asosan yog‘ingarchiliksiz ob-havo bo‘lishi kutilmoqda, faqat tog‘li hududlarda baʼzi joylarda yomg‘ir yog‘ishi mumkin, baland tog‘larda yomg‘ir qorga aylanishi ehtimoli bor. Ayrim joylarda shamol tezligi 17-22 m/s gacha kuchayishi mumkin.
Shanba va yakshanba kuni sovuq antitsiklon taʼsiri hisobiga harorat kechalari 12-15 daraja iliqqacha pasayadi, kunduz kunlari esa asta-sekin isiydi va yakshanba kuni harorat 27-30 daraja issiqqacha ko‘tariladi.
