Somalilik muhojir avtobusda 5 nafar yo‘lovchiga pichoq sanchdi
Italiyaning Rimini shahrida avtobusda ketayotgan erkak besh kishiga pichoq bilan hujum qildi, deb yozadi “Corriere”.
Maʼlum qilinishicha, bir yo‘lovchi avtobusda ikki nafar nazoratchi qizga pichoq sanchgan. Nazoratchi qizlar yo‘lovchidan avtobus chiptasini taqdim etishni so‘ragan. Yo‘lovchi dastlab bu talabga javob bermadi, lekin ikkinchi marta so‘rashganidan so‘ng sumkasidan pichoq chiqarib, bir qizning bo‘yniga, ikkinchisining yelkasiga sanchdi.
Erkak avtobusda yana uchta yo‘lovchi, shu jumladan, voyaga yetmagan bolani jarohatladi. Keyin esa voqea joyidan qochib ketgan.
Politsiya gumondorni temir yo‘l bo‘yidan hibsga oldi: u 26 yoshli Somalidan kelgan muhojir ekani maʼlum bo‘ldi.
Xabar qilinishicha, hujumdan sal oldin erkak Italiyada qochqin maqomini olish uchun ariza bergan.
Huquq -tartibot idoralari uning hujum paytida giyohvandlik taʼsiri ostida bo‘lishi mumkin degan taxminni bildirgan.
Bundan avval Britaniyaning Bristol shahrida nomaʼlum erkak yoqilg‘i quyish shoxobchasidagi do‘kon xodimlariga pichoq bilan hujum qilgan edi.
