“Prezident Shavkat Mirziyoyevning madaniy merosni asrab-avaylashga qaratilgan tashabbuslari tahsinga loyiq” — dunyo olimlari

 

 

“O‘zbekiston madaniy merosi — yangi Renessans poydevori” V Xalqaro kongressi ishtirokchilari, dunyoning 40dan ortiq mamlakatlaridan O‘zbekiston madaniy merosini o‘rganish, saqlash va ommaviylashtirish Butunjahon jamiyati aʼzolari O‘zbekiston Prezidentiga anʼanaviy Murojaat qabul qilishdi. Olimlar Davlat rahbarining mamlakatda, jumladan, ilm-fan va madaniyat sohasida amalga oshirilayotgan keng ko‘lamli va tub islohotlar borasidagi pozitsiyasiga xayrixoh ekanligini taʼkidlagan.

“O‘zbekistonda uchinchi Renessans uchun sharoit yaratishga qaratilgan milliy g‘oya, avvalo puxta o‘ylangan madaniy siyosatga asoslangan. Aynan madaniyat mamlakatning tiklanishiga, jamiyat maʼnaviyatining yuksalishiga, odamlarning, ayniqsa, yosh avlodning vatanparvarligini tarbiyalashga asos bo‘ladi. O‘zbekistonda milliy madaniyat sohasidagi tizimli islohotlar tufayli qadimiy yodgorliklarni keng miqyosda tiklash va o‘rganish ishlari olib borilmoqda, ilmiy va maʼrifiy ishlar yangi turtki olmoqda, xalq ijodiyoti hamda nomoddiy merosni asrab-avaylash davlat darajasida qo‘llab-quvvatlanmoqda.

Mamlakatning bu merosni asrab-avaylashga qaratilgan siyosati chindan ham tahsinga sazovolr. So‘nggi yillarda u keskin o‘zgarishlarga duch keldi. Bu Sizdan beqiyos  ulkan kuch talab qilgani rost. Sizning ajdodlar yutuqlariga, ularning tajribasini saqlab qolish va takomillashtirishga bo‘lgan shaxsiy eʼtiboringiz va hurmatingiz hammamiz uchun namunadir”, – deyiladi Murojaatda.

 

 

Olimlar, shuningdek, Jamiyat ishining natijalarini taʼkidlashdi.

 

“Mamlakatdagi fan va madaniyat muassasalarining ishi O‘zbekiston Respublikasi Prezidenti Shavkat Mirziyoyev g‘amxo‘rligi va siyosiy irodasi bilan qo‘llab-quvvatlanayotgani  alohida eʼtirofga sazovor”, — deya qayd etdi RFA Sharq qo‘lyozmalari instituti direktori Irina Popova (Rossiya).

 

“So‘nggi yillarda bizning Jamiyat yuzlab nashriyot, tadqiqot, ommaviy axborot vositalari va ilmiy-maʼrifiy loyihalarni, jumladan, “O‘zbekiston madaniy merosi” turkumidagi ellik jildli rasmli kitob-albomlarni  nashr etish bo‘yicha keng ko‘lamli loyihani amalga oshirdi. Davlat ko‘magi tufayli bu jildlar har biri o‘n ming nusxada nashr etiladi hamda O‘zbekistonning ilmiy va o‘quv muassasalariga, shu jumladan umumtaʼlim maktablariga bepul tarqatiladi. Dunyo muzeylaridagi O‘zbekistonning madaniy merosi haqida hikoya qiluvchi ushbu turkum ustidagi ishlar, hujjatli va badiiy filmlar yaratish, ilmiy anjumanlar o‘tkazish, meros yodgorliklarini o‘rganish bilan bog‘liq boshqa sohalardagi loyihalarni amalga oshirish davom etmoqda. Sizni ishontirib aytamizki, biz avvalgidek mamlakatingiz merosini asrab-avaylashga o‘z hissamizni qo‘shishga tayyormiz”, deyiladi Murojaatda.

 

 

“Biz, dunyoning turli mamlakatlari — Yevropa, Osiyo va Amerikadan kelgan mutaxassislar, Sizning bu sohadagi noyob tashabbuslaringizni har tomonlama qo‘llab-quvvatlashga tayyormiz. O‘zbekistonning madaniy merosini o‘rganish sohasida ish olib borar ekanmiz, har birimiz O‘zbekiston hududida bronza davridan boshlab, qadim zamonlardan buyon rivojlanib kelgan eng boy madaniyatning qadr-qimmatiga ishonamiz. Bu mamlakatning nihoyatda boy maʼnaviy va moddiy merosi jahon sivilizatsiyasi uchun abadiy qadriyatdir”, —  deb taʼkidladi Temuriylar sanʼati va tarixini o‘rganish assotsiatsiyasi prezidenti va hammuassisi Frederik Bopertyui-Bressand (Fransiya).

 

Kongress ishtirokchilari, Butunjahon jamiyati aʼzolari O‘zbekiston Prezidenti Shavkat Mirziyoyevning O‘zbekiston madaniy merosini asrab-avaylash borasidagi tashabbuslari va harakatlarini har tomonlama qo‘llab-quvvatlashga tayyor ekangini bildirdi.

 

 

“Bugungi kunda Yangi O‘zbekistonda amalga oshirilayotgan yangilanishlar yuksak hurmatga loyiq. Sharja Arxeologiya boshqarmasi nomidan O‘zbekiston Prezidenti va hukumatiga butun dunyo xalqlari o‘rtasidagi madaniy aloqalarni mustahkamlash yo‘lidagi saʼy-harakatlari uchun minnatdorlik va tashakkurimni izhor qilaman”, — deya o‘z fikrini bildirdi Sharja Arxeologiya kengashi  direktori Eiza Yusif (BAA).

 

Rossiya Davlat Ermitajining bosh direktori Mixail Piotrovskiy Butunjahon jamiyatining V kongressi ishtirokchilariga maxsus murojaat yo‘lladi:

 

“Bizning muzey va O‘zbekistonning ko‘plab muassasalarini uzoq yillik do‘stlik, shuningdek madaniyat va fan sohalarida bugungi murakkab zamonda ham faol davom etib kelayotgan hamkorlik rishtalari bog‘lab keladi. Biz o‘zbekistonlik hamkasblarimiz bilan amalga oshirilgan barcha loyihalarga doim mamnun bo‘lib kelganmiz va o‘rtadagi hamkorlik yana uzoq yillar davom etishi, yana-da keng tus olishiga umid qilib qolamiz”.