Sudda masofaviy qatnashish mumkin
O‘zbekiston sudlarga raqamli texnologiyalarni joriy qilish bo‘yicha dunyoda yetakchi yigirma davlatdan biri. Mamlakat sudlarida so‘nggi besh yillikda sudlar faoliyati to‘la elektronlashtirildi.
14-sentabr kuni O‘zbekiston Respublikasi Oliy Sudida odil sudlovni amalga oshirishda ochiqlik va shaffoflikni ta’minlash bo‘yicha sudlar faoliyatiga joriy etilgan axborot-kommunikatsiya texnologiyalari taqdimoti hamda shu mavzuga doir matbuot anjumani bo‘lib o‘tdi.
Unda so‘zga chiqqan Oliy Sud Axborot-kommunikatsiya texnologiyalarini joriy qilish va axborot xavfsizligini ta’minlash boshqarmasi boshlig‘i Bahrom Ochilov sudlarda AKT joriy qilinishi yuzasidan ma’lumot berdi.
Joriy etilgan yangiliklardan biri – Respublika sudlarida videokonferensiya tizimidir. Bu barcha tomonlar uchun katta qulaylik yaratgan. Hozirda butun respublika bo‘ylab 321 ta sud majlisi zali ushbu tizim bilan to‘liq ta’minlangan. Videokonferensiya aloqa orqali tomonlar sud zaliga kelishi shart emas. Bu orqali tomonlar shu kungacha 21,4 milliard so‘m mablag‘ tejab qolgan.
Shu bilan birga endilikda ushbu tizim tufayli chet eldan turib ham sud ishida qatnashish mumkin.
Keyingi bosqichda sud majlisida videokonferensiya aloqa tizimi bo‘yicha maxsus mobil dasturni ishlab chiqish rejalashtirilgan. Shu bilan birga tizim orqali jazoni ijro etish muassasalaridagi shaxslarni sudyalar bilan bevosita bog‘lash maqsad qilingan.
Shu kungacha sud qarorlarini olish juda muammoli vazifa edi. Lekin tizimni raqamlashtirish doirasida public.sud.uz platformasi yaratildi. Shu kungacha platforma orqali 1 million 700 mingdan ziyod qonuniy kuchga kirgan qarorlar e’lon qilingan.
Yana bir qulaylik – fuqarolik va iqtisodiy sudlarga murojaat qilish uchun da’vo arizalari va boshqa turdagi arizalar namunalari keltirilgan calcute.sud.uz maxsus rukni ishga tushirildi.
- Fuqarolarni eng ko‘p qiynaydigan masala bu sudga murojaat qilishdagi hujjatlardir. Ko‘pchilik uni yozdirish uchun advokatga boradi. Advokat xizmati esa pullik. Hozirda bu platformada o‘zbek, rus va qoraqalpoq tillarida arizalar namunalari keltirilgan, - deydi Bahrom Ochilov.
Oliy sudning boshqa davlat organlari axborot tizimlari bilan jadal integratsiyasi ketmoqda. Avvallari 25 kungacha cho‘ziladigan ma’lumot to‘plash hozirda bir necha kundan oshmaydi. Buning sababi, Oliy Sudning “E-XSUD” tarmog‘i 28 davlat organlari axborot tizimlaridan onlayn ma’lumotlarni olish imkoniga ega.
Bularning barchasi ko‘rilayotgan ishlarning tez va samarali yakunlashiga sabab bo‘ladi. Sud tizimidagi byurokratiyaning keskin kamayishiga yordam beradi.
