Bill Geyts yangi pandemiyalarga qarshi kurashning yagona yo‘lini aytdi
Bu haqda Geyts “The Wall Street Journal” nashriga bergan intervyusida maʼlum qilgan.
Uning fikricha, keyingi pandemiyalar hozirgidan-da yomonroq bo‘lishi mumkin. Lekin insoniyat uning oldini olishga harakat qilmayapti. Milliarder yangi pandemiyalarga qarshi eng yaxshi chora — vaksinalarni dastlabki 100 kunda yaratish va ishlab chiqarishni tezlashtirish ekanini taʼkidlagan. Geyts buni amalga oshirishni imkoni bor deb hisoblamoqda.
Bundan avval Bill va Melinda Geyts fondi maxsus hisobotda vaksinalar taqsimotidagi tengsizlikni qoralab chiqqan edi. Hisobotda aytilishicha, rivojlangan davlatlarda allaqachon 80 foizgacha aholi to‘liq emlangan bo‘lsa, qashshoq davlatlarning ayrimlarida bu ko‘rsatkich 1 foizga ham yetmaydi. Masalan, butun boshli Afrika qitʼasi 48 million doza vaksina olgan bo‘lsa, Kaliforniya shtati 42 million dozada vaksina qabul qilgan. Lekin shtat aholisi Afrikanikidan 30 barobar kam. Shuningdek, hisobotda insoniyatning yuqumli kasalliklarga qarshi kurashning umumiy mexanizmlarini yaratishga qodir emasligi qayd etilgan.
Geyts pandemiyaga qarshi faol kurashib kelayotgan shaxslardan. Uning fondi yangi koronaviruslarga qarshi samarali vaksina va preparatlvr yaratish uchun millionlab dollar mablag‘ ajratib keladi. Xususan, 10 sentyabrda fond shu maqsadda 70 million dollar xayriya qilgan.
Eslatib o‘tamiz, bundan avval Buyuk Britaniyada koronavirusga qarshi bolalar ham emlanishi maʼlum qilingan edi.
Jahongir Qo‘ziyev
