O‘qituvchilarga attestatsiyadan o‘tganlik to‘g‘risidagi sertifikat elektron shaklda beriladi
Pedagog kadrlarga qog‘oz shakldagi attestatsiyadan o‘tganlik to‘g‘risidagi sertifikat berish amaliyoti bekor qilinadi.
Shuningdek, elektron raqamli imzo bilan tasdiqlangan va QR-kod qo‘yilgan elektron shakldagi sertifikat berish tartibi joriy etiladi.
Bu haqda Taʼlim sifatini nazorat qilish Davlat inspeksiyasi xabr qildi.
Unda aytilishicha, endi o‘qituvchi xohlagan paytida QR-kod qo‘yilgan elektron shakldagi sertifikatni o‘zining shaxsiy kabinetidan yuklab olishi mumkin.
Taʼlim inspeksiyasining “pedkadr.tdi.uz” platformasi UzASBO hamda maktab boshqaruv (ERP) dasturlari bilan integratsiya qilinmoqda. Bu, o‘z navbatida, maktab buxgalteriyasiga o‘z toifasini oshirgan o‘qituvchilardan hech qanday hujjat talab qilmasdan, ularning ish haqini avtomatik tarzda qayta hisoblash va to‘lab borishga imkon beradi.
Mazkur qaror kuchga kirgunga qadar attestatsiyadan o‘tganlik to‘g‘risidagi berilgan sertifikatlar o‘z kuchida qoladi. Shu bilan birga amalda malaka toifasini tasdiqlashda, shuningdek, amal qilish muddati tugagunga qadar sertifikatda ko‘rsatilgan malaka toifasi bo‘yicha bazaviy tarif stavkalari asosida haq to‘lash kabilar hisobga olinadi.
Eslatib o‘tamiz, avvalroq innovatsion platforma o‘qituvchilar malaka oshirishi uchun yangi imkoniyat ekani haqida xabar berilgandi.
Cho‘lponoy Ahmedova
