Tog‘li Qorabog‘ degan hudud yo‘q — Ilhom Aliyev
Ozarbayjon Prezidenti BMTdagi chiqishida Ozarbayjon masalasiga to‘xtaldi. Bu haqda “ТАСС” xabar qildi.
“Ozarbayjon harbiy-siyosiy yo‘l bilan 30 yillik nizoni hal qildi, o‘z hududiy yaxlitligi va tarixiy adolatni tikladi. Qorabog‘ nizosi o‘tmishda qoldi. Ozarbayjonda endilikda Tog‘li Qorabog‘ nomli maʼmuriy-hududiy birlik yo‘q. 7-iyuldagi Prezident qarori bilan biz Qorabog‘ va Sharqiy Zangezur iqtisodiy zonasini tashkil qildik. Fursatdan foydalanib, huquqiy jihatdan mavjud bo‘lmagan nomlarni ishlatmaslikka chaqiraman”, — degan Ilhom Aliyev. U Tog‘li Qorabog‘ nomini ishlatishni “siyosiy nayrang” sifatida baholagan.
Shuningdek, Ozarbayjon rahbari xalqaro energetik kompaniyalarni Qorabog‘ hududida “yashil” energetikani rivojlantirishga chaqirib: “Men xalqaro energetik kompaniyalarni Ozarbayjonning ozod qilingan hududlariga investitsiya kiritishga chaqiraman”, — deb aytgan.
Bundan avval Qorabog‘ va Sharqiy Zangezur “yashil” energetika zonasi deb belgilangani maʼlum qilindi. Aliyevning so‘zlariga ko‘ra, bu hududlarning energetik salohiyati 7.2 megavatt quyosh va 2 ming megavatt shamol energiyasini tashkil etadi.
Eslatib o‘tamiz, bundan avval Ilhom Aliyev Qorabog‘ nizosi to‘liq barham topganini maʼlum qilgandi.
