Toshkent viloyatidagi xonadondan katta miqdordagi giyohvandlik vositalari aniqlandi
Toshkent viloyati IIBB JQB giyohvandlik vositalari bilan qonunga xilof ravishda muomala qilishga qarshi kurashish boʼlimiga katta miqdordagi giyohvandlik vositalari saqlayotgan fuqaro haqida xabar kelib tushgan.
Shunga asosan Toshkent tumani “Ibrat” MFYda yashovchi, 1976-yilda tugʼilgan D.K.ning yashash xonadoni xolislar ishtirokida koʼzdan kechirildi. Bu haqda viloyat Ichki ishlar bosh boshqarmasi matbuot xizmati xabar berdi.
Tekshiruv davomida uy tomorqasida 11 tup kannabis ekilgani, tovuqxonasida 20 kg marixuana, oshxona javonida 500 gr koʼknor urugʼi va 700 gr nasha urugʼi borligi aniqlandi. Shuningdek, ushbu moddalar isteʼmoli uchun moʼljallangan qoʼlbola usulda yasalgan idishlar daliliy ashyo sifatida olingan.
Hozirda mazkur holat yuzasidan qoʼshimcha surishtiruv ishlari olib borilmoqda.
Bundan avval Toshkent shahrida uyida giyohvand modda va qurol saqlagan fuqaro qoʼlga olingani haqida xabar berilgandi.
Munojat Valiyeva
