Turkiyalik kinoijodkorlar Toshkentda
Melisa Pamuk, Filiz Axmet, Sefa Zengin kabi aktyorlardan iborat turk delegatsiyasi Toshkent xalqaro aeroportida kutib olindi. "Qashqirlar makoni" seriali qahramoni, aktyor Sefa Zengin o‘z taassurotlari bilan o‘rtoqlashdi:
— O‘zbekiston tuprog‘iga qadam qo‘yganimizdan nihoyatda xursandmiz. Yurtingizdagi katta o‘zgarishlar hamda yangiliklardan xabarimiz bor. Yangi O‘zbekiston dunyoga yuz tutmoqda. Toshkent xalqaro kinofestivalining o‘tkazilishi ham mamlakatingizning dunyodagi obro‘sidan darak beradi. Yangi O‘zbekistondagi yangilanishlar turk xalqini ham quvontirmoqda. Xalqaro kinofestival qardosh o‘zbek xalqining madaniyat, san’ati va boshqa sohalardagi muvaffaqiyatlaridan dunyo ahlini xabardor qilishda yaxshi bir imkoniyat deb bilaman.
Kun davomida kinofestivalga ishtiroki kutilayotgan Belarus, Hindiston, AQSH va Markaziy Osiyo davlatlaridan kinoijodkorlar uchib kelishdi. Delegatsiyalarning kelishi davom etmoqda.
