Aleksey Navalniyga “Ozodlik ritsari” mukofoti berildi
“Meduza”ning xabar berishicha, Rossiyalik muxolifatchi Aleksey Navalniy Polshaning Kazimir Pulavskiy nomli fondi tomonidan taʼsis etilgan “Ozodlik ritsari” mukofotiga loyiq ko‘rildi.
Maʼlumki, “Ozodlik ritsari” mukofoti 2005 yildan buyon “butun dunyoda demokratiya, erkinlik va tenglik taraqqiyotiga katta hissa qo‘shgan” kishilarga beriladi. Bundan avval, ushbu mukofotga loyiq topilgan yagona rossiyalik Mixail Xodorkovskiy edi.
Taqdirlash marosimi 5 oktyabr kuni Varshavada bo‘lib o‘tadi. “Iv Roshe” ishi bo‘yicha koloniyada jazo o‘tayotgan Navalniyning o‘rniga mukofotni uning safdoshlari Vladimir Milov va Leonid Volkov qabul qiladi.
Maʼlumot uchun, Kazimir Pulavskiy fondi Polshaning tashqi siyosat va xalqaro xavfsizlik masalalariga ixtisoslashgan tahlil markazi hisoblanadi. Fond XVIII asrda fidoyilik ko‘rsatgan polshalik general Kazimir Pulavskiy nomi bilan ataladi. Fondning tarkibida 60 nafar ekspert mavjud. Ularning asosiy tadqiqot yo‘nalishlari Rossiya va possovet hududidir. Har yili fond Varshava Xavfsizlik forumini o‘tkazadi, unda Yevropa Ittifoqi va NATO mamlakatlari vakillari ishtirok etadi.
Shu yil boshida Aleksey Navalniy Boris Nemsov nomidagi fond mukofotiga (u mukofot pulni siyosiy mahbuslarning oilasiga topshirgan) va Jeneva Inson huquqlari forumi mukofotiga sazovar bo‘lgandi.
Eslatib o‘tamiz, avvalroq Saakashvili nima uchun Gruziyaga qaytgani maʼlum qilingani xabar qilingandi.
Cho‘lponoy Ahmedova
