Lyuk Besson: Biz yosh ijodkorlarga kino yaratish imkoniyatini taqdim etishimiz kerak
“Ipak yo‘li durdonasi” XIII Toshkent xalqaro kinofestivali doirasida bugun, 2 oktyabr kuni taniqli fransuz kinorejissyori Lyuk Besson bilan ijodiy uchrashuv bo‘lib o‘tdi.
Unda rejissyor filmlarining yaratilishi haqidagi xotiralari bilan o‘rtoqlashdi va yosh kinoijodkorlarga o‘z maslahatlarini berdi.
“Toshkent xalqaro kinofestivalida ishtirok etayotganimdan juda ham mamnunman va shuni aytmoqchimanki, festival birinchi navbatda yoshlar uchun. Biz yosh ijodkorlarga kino yaratish imkoniyatini taqdim etishimiz kerak. Esimda, endigina film suratga olishni boshlaganimda, yakuniy natijani faqatgina ota-onamga ko‘rsata olardim, Chunki filmlarimni taniqli kinoijodkorlarga baholash uchun ko‘rsatishning imkoni yo‘q edi.
Endi xohlagan kishi qisqa metrajli film suratga olishi, uni montaj qilishi, internetga yuklashi va shu orqali dunyoga tarqatishi mumkin. Menimcha, yoshlar juda omadli, chunki hozir ular uchun har qanday imkoniyatlar mavjud”, — dedi u.
Uchrashuv davomida Lyuk Besson yoshlarga o‘zining kerakli maslahatlarini ham berdi:
“Men beradigan eng yaxshi maslahat — o‘zingizga nisbatan to‘g‘riso‘z bo‘ling. Yuragingizdan, qalbingizdan joy olgan ishni qiling. Ana shunda natija insonlarga yoqadi. Agar hikoyangiz yaxshi ekanini bilsangiz, taslim bo‘lmang. Men o‘z vaqtida qancha rad javobini olganimni bilmaysiz. Sizning filmingiz sizning o‘zligingizni aks ettirishi kerak. Axir, ekranda ko‘rsatiladigan his-tuyg‘ular haqiqiydir.”
Fransuz rejissyori o‘zbek kinosi haqida ham o‘z fikrlarini bildirdi.
“O‘zbekiston ajoyib mamlakat. Ishonamanki, o‘zbek kinematografiyasining filmlari Kann kinofestivalida munosib o‘rin egallaydi. Men, albatta, ularni qachondir u yerda ko‘rishga umid qilaman”.
Eslatib o‘tamiz, kinofestival bosh homiysi: AGMK, NGMK va “O‘zbekneftgaz”. Hamkor homiylar: “O‘ZBEKTELEKOM”, “O‘zdonmahsulot” AK, “O‘zpromstroybank” ATB, “Ipoteka-bank” ATIB, “Asakabank” AJ, “O‘zbekiston temir yo‘llari”, “Hududgazta‘minot”, “UzAuto Motors” AJ, “O‘zmetkombinat” AJ, “Milliy bank” AJ, “Farg‘onaazot” AJ, “Eriell”, “Bosch” TM, “Easy Booking”.
Avvalroq fransuz aktyori Jerar Depardye, amerikalik taniqli prodyuser Bob Van Ronkel hamda hind aktyori Gulshan Grover Toshkent xalqaro kinofestivalida ishtirok etayotgani va ular festival haqidagi o‘z fiklarini bildirgandi. Shuningdek, ravshana kurkova ona shahrim — toshkentda fevtival sabab mehmon bo‘lgani haqida xabar berilgandi.
