Farg‘onada o‘zaro nizo sabab do‘kon yoqib yuborildi
Bu voqea joriy yilning 5 oktyabr kuni E. va uning tanishlari O. va boshqalar o‘rtasida kelib chiqqan kelishmovchilik sabab yuzaga kelgan.
Ushbu fuqarolar jamiyatda yurish-turish qoidalarini qasddan mensimasdan, jamoat joyida bir-biriga tan jarohati yetkazgan. Shundan so‘ng, E. va uning sheriklari O.ga tegishli bo‘lgan "Baraka burger" do‘koni oynalarini sindirishib, uni yoqib yuborgan.
Mazkur holat yuzasidan Farg‘ona shahar Ichki ishlar organlari faoliyatini muvofiqlashtirish boshqarmasi huzuridagi tergov bo‘limi tomonidan Jinoyat kodeksining 277-moddasi (bezorilik) bilan jinoyat ishi qo‘zg‘atilib, dastlabki tergov harakatlari olib borilmoqda.
Xozirda Jinoyat ishi bo‘yicha E. ismli shaxs Jinoyat kodeksining 277- (bezorilik) hamda 173- (mulkni qasddan nobud qilish yoki unga zarar yetkazish) moddalari bilan, O. ismli fuqaro esa shu kodeksning 277-moddasi bilan gumon qilinuvchi tariqasida jalb qilinib, protsessual tartibda ushlangan.
Qolgan ishtirokchilarni aniqlash choralari ko‘rilmoqda.
Avvalroq To‘yxonada kelin-kuyov tomonlar o‘rtasida katta janjal yuzaga kelgani hamda Jarqo‘rg‘onda bezorilik qilgan er-xotinga nisbatan jinoyat ishi qo‘zg‘atilgani haqida xabar berilgandi.
