O‘simlik moyiga bo‘lgan yillik ehtiyoji qanchaligi maʼlum bo‘ldi
O‘zbekiston aholisining o‘simlik moyiga bo‘lgan yillik ehtiyoji 483 ming tonnani tashkil etadi. Bu haqda “O‘zyog‘moysanoat” uyushmasi xabar berdi.
Qayd etilishicha, mazkur ehtiyojning 251 ming tonnasi mahalliy xom ashyo, 45 ming tonnasi import xom ashyosi hisobiga qoplanadi. Shuningdek, yiliga o‘rtacha 187 ming tonna import qilingan tayyor o‘simlik moyi aholi isteʼmoli uchun yo‘naltiriladi.
Taʼkidlanishicha, respublikada isteʼmol qilinayotgan o‘simlik moyining 230 ming tonnasini kungaboqar moyi, 203 ming tonnasini paxta moyi, 48 ming tonnasini zig‘ir, palma, maxsar, zaytun va boshqa moylar tashkil etadi.
Maʼlumot uchun, mamlakatda 500 dan ortiq yirik va kichik yog‘-moy korxonasi mavjud bo‘lib, shundan 300 tasi sanoat korxonasi, 200dan ortig‘i kichik korxona hisoblanadi.
Cho‘lponoy Ahmedova
