Shohruxxonning o‘g‘li hibsga olindi
Shohruxxonning o‘g‘li Aryan Xon NDPS qonuni bo‘yicha hibsga olingan.
“Day.Az” Rossiya matbuotiga tayanib xabar berishicha, Bollivud super yulduzi Shohrux Xonning o‘g‘li 23 yashar Aryan Xon narkotik moddalar isteʼmol qilishi maʼlum bo‘lgan. Aryan Xon 2 oktyabr kuni Mumbay-Goa yo‘nalishi bo‘ylab Cordelia Cruises kemasida sayohat qilayotganda Narkotik moddalarni nazorat qilish byurosi tomonidan hibsga olingan.
Maʼlum bo‘lishicha, 2 oktyabr kuni Giyohvand moddalarni nazorat qilish byurosi (NCB) Mumbay sohillari yaqinidagi Cordelia Cruises kemasida reyd uyushtirgan. Aryan Xonni tintuv qilish jarayonida uning yonidan ekstazi, kokain, mefedron va charas kabi narkotik moddalar topilgan.
Hozirda Aryan bir vaqtning o‘zida «Giyohvandlik vositalari va psixotrop moddalar to‘g‘risida»gi qonunning bir nechta moddalari bilan, jumladan, giyohvand moddalarni isteʼmol qilish, ishlab chiqarish, saqlash va sotib olishda ayblanmoqda.
Maʼlumotlarga ko‘ra, u va yana ikki kishi - Arbaz Seth Merchant va Munmun Dxema ham so‘roq qilingan. So‘ng JJ shifoxonasida tibbiy ko‘rikdan o‘tkazilgan. Tibbiy xulosalar yigit qonida narkotik modda borligini tasdiqlagan. Shundan so‘ng "Giyohvandlik vositalari va psixotrop moddalar to‘g‘risida"gi qonunning 27 -moddasi bo‘yicha ayblov qo‘yilib, NDPS qonuniga asosan hibsga olingan. Wion News xabariga ko‘ra, Aryan Xonni himoya qilish uchun o‘sha kuni Mumbayga advokat Satish Maneshinde ham yetib kelgan.
-“Mumbaydagi olib borilayotgan ishlar davom etadi. Agar maʼlumotlarga qaralsa, mazkur yilda 300 dan ortiq reyd o‘tkazilishi kerak. Bu chet el fuqarolari, kinosanoat vakillari yoki badavlat kishilar bo‘lishidan qatʼi nazar davom etadi», — deydi Mumbay Giyohvand moddalarni nazorat qilish byurosi (NCB) direktori Samir Vanxedan.
Avvalroq Hindistonda Afg‘onistondan kirib kelgan 3 tonnaga yaqin geroin aniqlangani haqida xabar bergan edik.
Munojat Valiyeva
