O‘zbekistonda hafta davomida kuzatiladigan ob-havo maʼlumoti eʼlon qilindi
“O‘zgidromet” hafta davomida qanday ob-havo kuzatilishini maʼlum qildi.
Shanba va yakshanba kunlari O‘zbekiston hududiga Rossiyaning Yevropa hududidan sovuq va nam havo massalari kirib keldi. Dam olish kunlari respublika bo‘yicha birinchi kuz yomg‘iri yog‘di va haroratning sezilarli darajada pasayishi kuzatildi.
“O‘zgidromet” xabariga ko‘ra, bugun va ertaga respublika sovuq antitsiklon taʼsiri ostida bo‘ladi. Sovuq havo asosan tungi haroratga taʼsir qilib, 2-5 daraja iliqni tashkil etadi. Kunduz kuni havo harorati 18-20 daraja issiqqacha ko‘tariladi.
Hafta o‘rtasidan havo harorati asta-sekin ko‘tarila boshlaydi va oktabr oyining o‘rtalari uchun bo‘lgan meʼyoriy qiymatlarga yetadi. Havo harorati kechalari 6-9 daraja iliq, kunduz kunlari 20-23 daraja issiq atrofida, janubda 25 daraja issiqqacha bo‘ladi.
Hafta davomida yog‘ingarchilik kutilmaydi, havo asosan quyoshli bo‘ladi. 12-13 oktabrda respublika bo‘yicha baʼzi joylarda shamol tezligi 15-20 m/s gacha kuchayishi mumkin.
