Fransiya kosmosni zabt etishda o‘z o‘rniga ega bo‘lishi kerak — Emmanuel Makron
Fransiya 2026-yilga qadar qayta ishlatiladigan mini-kosmik transport vositalarini yaratishi kerak. Bu haqda mamlakat prezidenti Emmanuel Makron Yelisey saroyida “Fransiya-2030” yangi sarmoyaviy dastur taqdimotidagi chiqishida maʼlum qildi.
"Fransiya kosmosni kashf qilishning yangi tendensiyalari ustida ishlashi, kosmosni zabt etishda o‘z o‘rniga ega bo‘lishi kerak. Bu sohadagi suverenitetini taʼminlashi, uni yangi pog‘onaga ko‘tarishi, ilg‘or texnologiyalarni ishlab chiqarishi lozim. Shu bois mamlakat oldiga qisqa muddatlarda bajarilishi kerak bo‘lgan bir qancha maqsad-vazifalar qo‘yilgan. Biz bu maqsadlarimizga 2026 yilga qadar erishamiz, deb umid qilamiz", — dedi Makron.
U, shuningdek, mikro va mini sunʼiy yo‘ldoshlarni ishlab chiqarish, ulardan foydalanish, orbital kosmik kemalar turkumining yangi avlodlarini yaratish hamda kosmik sohada yangi xizmatlarni yo‘lga qo‘yish kerakligini taʼkidladi.
Bundan avval Rossiya 2021-yilda neft-gazdan o‘tgan yildagiga nisbatan 50 milliard dollar ko‘p daromad olishi kutilayotgani haqida xabar berilgandi.
Nasiba To‘xtayeva
