AQSH tarixidagi eng mashhur prezident Bill Klinton qanday kasalliklarni boshdan kechirgan?
AQSH sobiq prezidenti Bill Klinton kasalxonaga yotqizildi. Bu haqda CNN xabar berdi. Telekanal maʼlumotlariga ko‘ra, sobiq prezident qonida infeksiya aniqlangan.
Hozirda Klintonni antibiotiklar bilan muolaja qilishmoqda. O‘z navbatida sobiq prezident vakili Anxel Urenya Klinton kasalxonada ikki kundan beri davolanayotganligi va hozirda ahvoli yaxshi ekanini maʼlum qildi. “Seshanba kuni kechqurun prezident Klinton Kaliforniya universiteti tibbiyot markaziga olib kelindi. U Covid-19 bilan bog‘liq bo‘lmagan infeksiyaga qarshi muolaja olmoqda. Hozirda Klintonning ahvoli yaxshilanib bormoqda, u ko‘tarinki ruhda va tibbiyot xodimlaridan minnatdor”, – deb yozgan Urenya Twitter sahifasida.
Bu Bill Klintonning birinchi marta kasalxonaga yotqizilishi emas. 2001 yilda unda teri saratoni aniqlangan. O‘shanda Oq Uy sobiq prezident terisidagi kasallangan nuqta operatsiya qilingani to‘g‘risida bayonot bergan.
Bundan tashqari, Klinton ikki marta yurak xuruji bilan kasalxonaga yotqizilgan. Birinchi marta u yurak bilan bog‘liq muammoga 2004 yilda duch kelgan. 2010 yilda esa ikkinchi marta kardiologlar bilan “uchrashgan”. Vrachlar o‘shanda Klintonning kasalligi oson davolanmasligini maʼlum qilgandi. Shuningdek, mutaxassislar sobiq prezidentning kasalligini genetika bilan bog‘lashgandi. Maʼlum bo‘lishicha, Klintonning ona avlodida yurak bilan bog‘lik kasalliklar kuzatilgan.
Klinton AQSH tarixidagi eng muvaffaqiyatli va mashhur prezidentlardan bo‘lgan. U 1993-2001 yilda AQSHni boshqargan. Prezidentligining so‘nggi davrida mamlakatning 66 foiz aholisi uning faoliyatini qo‘llab-quvvatlagan.
Bundan avval AQSH sobiq prezidenti Donald Tramp navbatdagi saylovlarda ishtirok etishi hamda Baydendan isteʼfoga chiqishini talab qilgani xabar qilingandi
