Google korporatsiyasi Yer yuzidagi insoniyatni qayta dasturlash va tarmoq foydalanuvchilarini kuzatishga urinyapti — Robert Epshteyn
Kaliforniyadagi xulqiy tadqiqotlar va texnologiyalar institutining yetakchi tadqiqotchi psixologi va Garvard universiteti fan doktori Robert Epshteyn lenta.ru‘ga bergan intervyusida AQSHning Google korporatsiyasi Yer yuzidagi insoniyatni qayta dasturlash va tarmoq foydalanuvchilarini kuzatishga urinayotganini aytdi.
Hozirgi kunda Google shunchaki qidiruv tizimidan deyarli chegaralanmagan resursga ega ulkan korporatsiyaga aylandi. Dunyoda ommalashgani bo‘yicha ikkinchi o‘rinda turuvchi YouTube videoxostingi kabi 200 dan ortiq servis ayni paytda Google tarkibiga kiradi.
Epshteynning aytishicha, shu yo‘l bilan kompaniya foydalanuvchilarning shaxsiy maʼlumotlarini yig‘adi.
Kompaniya maqsadi "The Selfish Ledger" nomli 8 daqiqali video umumiy foydalanishga sizib chiqqach ochiqlandi. Unda yig‘ilgan maʼlumotlar orqali foydalanuvchining xulqini taxmin qilish va uning fikrini boshqa qarorlar foydasiga o‘zgartirish mumkinligi aytilgan.
Epshteynning tadqiqotlari shuni ko‘rsatadiki, Google o‘z imkoniyatlaridan AQSHdagi prezident saylovi vaqtida foydalangan. Fan doktori “saylovoldi poygasida Google qidiruv tizimi natijalarida demokratlar foydasiga o‘zgarish bo‘lgan”ini aytgan.
Tadqiqotchilar bu maʼlumotni noyabr oyida, saylovga bir necha kun qolganda eʼlon qilgan va Google‘ni manipulyatsiyani to‘xtatishga chaqirgan.
Bir muddat avval 2021-yil Facebook, Google, Yandex, Apple O‘zbekistonga qancha soliq to‘lagani ochiqlangan edi.
Sharofat Mahmudova
