“Tashkent city”dagi dam olish va istirohat bog‘i sotuvga qo‘yilаdi
“Tashkent city” xalqaro ishbilarmonlik markazi Maʼmuriy kengashining tegishli qaroriga muvofiq, “Tashkent city” hududidagi zamonaviy dam olish va istirohat bog‘i baholangan qiymatda ochiq tanlov savdolari orqali sotish rejalashtirilgan.
Bu haqda Davlat aktivlarini boshqarish agentligi xabar qildi.
Davlat tender komissiyasining tegishli qaroriga asosan, obyektni xususiylashtirish va undan kelgusida foydalanish bo‘yicha “Master plan” ishlab chiqish uchun professional tashkilotni jalb etish belgilangan.
Shunga ko‘ra,
Davlat aktivlarini boshqarish agentligi “Tashkent city” hududidagi zamonaviy dam olish va istirohat bog‘ini kelgusida xususiylashtirish va undan foydalanish talablari, shuningdek, xususiylashtirish shartlari va shakllari bo‘yicha “Master plan” ishlab chiqish uchun professional tashkilot tanlab olish yuzasidan tanlov eʼlon qildi.
“Master plan”dagi tartib va talablar O‘zbekiston Respublikasi qonunchiligiga muvofiqligi, shuningdek, obyektning soha hamda individual xususiyatlarini hisobga olgan holda ishlab chiqilishi lozim.
Professional tashkilot “Master plan”ni ishlab chiqadi. U bo‘yicha barcha zaruriy xizmatlarni ko‘rsatadi. Buyurtmachi ushbu eʼlon bilan professional tashkilot va “Master plan”ga qo‘yiladigan dastlabki talablarni, shuningdek uning taklifining tuzilishini hamda tegishli tartibda baholanishini belgilaydi.
Maʼlumot uchun: “Tashkent city” xalqaro ishbilarmonlik markazi direksiyasi” DUK 2020 yilda ishga tushirilgan. Uning umumiy yer maydoni: 23,4679 gektar. Bino va inshootlar umumiy maydoni esa 3 933 kv.M.
Takliflar 2021 yil 25 oktyabrgacha qabul qilinadi.
Eslatib o‘tamiz, joriy yilning 14 oktyabr sanasidan boshlab “Tashkent city”ga bepul bo‘lgandi.
Bahriniso Madumarova
