Poytaxt ko‘chalarida haydovchilardan giyohvand moddalar topildi
Joriy yilning 16-oktabr kuni soat 12:00 da Bektemir tumanida joylashgan "Bektemir" YPH maskanida ko‘rinishi va turli hatti-harakatlari bilan xodimlrda shubha uyg‘otgan "Vaz-2107" rusumli avtomobil haydovchisi E.T. to‘xtatilib tekshirildi.
Xolis guvohlar ishtirokidagi tekshiruv davomida haydovchi E.T.ning cho‘ntagidan 1000 so‘mlik pul kupyurasiga o‘ralgan, jigar rangli, o‘tkir hidli, quritilgan o‘simlik moddasi topilgan.
Shuningdek, shu kuni Toshkent viloyatidan Toshkent shahriga kirib kelayotgan "Lacetti" rusumli avtomobil haydovchisi D.A. ham shubha ostiga olinib to‘xtatib tekshirildi. Xolis guvohlar ishtirokidagi tekshiruvda D.A.ning telefon g‘ilofi orqasidan giyohvand modda topildi.
Mazkur holatlar yuzasidan tegishli hujjatlar rasmiylashtirilib, fuqaro E.T. va D.A.lar hamda ulardan topilgan giyohvand moddalar Bektemir tumani IIO FMBga topshirildi.
Bundan avval Toshkentda sigareta qutisida giyohvand modda olib yurgan shaxs qo‘lga olingani, Urgutda fuqaro "opiy" va "geroin" bilan ushlangani haqida xabar berilgandi.
Munojat Valiyeva tayyorladi
