Qishloq ayollari ketmonini tashlab, saylovga boradimi?

 

Gender tengligi masalasiga davlat siyosati darajasida qaralayotgan bugungi kunda ayollarning necha foizi Prezidentlik saylovida ishtirok etib, o‘z tanlovini amalga oshirishga tayyor?! Bu savolning javobi hozircha mavhum. Ammo saylov kampaniyasi davomida ularning saylovga oid huquqiy bilimini oshirish borasida keng qamrovli ishlar olib borildi. Oliy Majlis Senati raisi Tanzila Norboyevaning aytishicha, “Bugun ayollar har jabhada faol. Yangi O‘zbekistonning yangicha dunyoqarashga ega hech bir ayoli saylovlarga befarq bo‘lishi mumkin emas”.

 

Tadbirda ishtirok etgan partiya vakillarining so‘zlariga ko‘ra, hattoki, uzoq qishloqlardagi dalalarda ketmon chopayotgan saylovchi ayollar bilan ham saylovoldi uchrashuvlari o‘tkazilgan. Qolaversa, bugungi o‘zbek ayollari “uxlayotgani yo‘q”. 

 

Ular ketmonini saylov kuni tashlaydimi-yo‘qmi salkam 7 kundan so‘ng maʼlum bo‘ladi.

 

Tadbir ishtirokchilari eʼtibor qaratgan yana bir muhim masala, uzoq qishloqlarda uy-ro‘zg‘or yumushlaridan bo‘shashi qiyin bo‘lgan xotin-qizlarni ortiqcha bezovta qilmaslik uchun oila boshi hamma uchun ovoz berishi kabi holatlar hamon uchraydi. Bu kabi holatlarning oldini olishda esa saylov uchastkalari vakillariga ko‘proq masʼuliyat yuklanadi. O‘zinikiga qo‘shib yana 2 yoki 3 ta pasport ko‘tarib kelgan oila boshi qatʼiy qaytarilishi lozim. Qolaversa, bu huquqiy hujjatlar bilan ham mustahkamlangan.

 

Ularni ro‘yxatga олиш masalaning  bir tomoni. Eng muhimi, ularni ovoz berish jarayoniga jalb etish. Xo‘sh, saylovchi ayollarning necha foizi ovoz berishda ishtirok etadi? Qishloq ayollari ketmonini tashlab, saylovga boradimi? Balki o‘sha kuni uy yumushlaridan ham ortmas?! Bu kabi savollarning aniq javobi yo‘q, albatta.

 

Ammo bir narsa aniqki, u xoh, erkak xoh ayol bo‘lsin, har kim o‘zi uchun tanlov qiladi. Hech kimning kimdir uchun ovoz berishga haqqi yo‘q.

 

Ma'lumot o'rnida: Bugungi kunda Prezident saylovini o‘tkazuvchi okrug saylov komissiyalari aʼzolarining 102 nafari va uchastka saylov komissiyalari aʼzolarining 65 ming 974 nafarini xotin-qizlar tashkil etmoqda.

2019 yil Qonunchilik palatasiga bo‘lib o‘tgan saylovda uchastka saylov komissiyalarining tarkibida 54 ming 361 nafar ayol ishtirok etgan.

Bu yilgi raqamlar bilan solishtirganda ushbu ko‘rsatkich 21,3 foizga oshganligini ko‘rish mumkin.

 

Avvalroq O‘zbekiston parlamenti xotin-qizlar soni bo‘yicha dunyoda 190 ta milliy parlament o‘rtasida 37-o‘ringa ko‘tarilgani  hamda 2022 yilda Samarqandda jahon mamlakatlari parlament ayol spikerlarining sammiti o‘tkazilishi rejalashtirilayotgani haqida xabar berilgandi.