Innovatsiya vazirligi tomonidan yetkazib berilgan ilmiy laboratoriya asbob-uskunalari ishlatilmayotganligi aniqlandi
Bu haqda AOKAda bo‘lib o‘tgan brifingda Innovatsion rivojlanish vazirligi axborot xizmati rahbari Nazokat Abduqunduzova batafsil maʼlumot berdi.
Unda аytilishicha, o‘tgan 9 oyda vazirlik tomonidan 30,0 milliard so‘mlik 56 ta startap loyihalari moliyalashtirildi. Shuningdek, 37 nafar yosh olim 6 ta xorijiy davlatlarga (AQSH, Rossiya, Buyuk Britaniya, Belarus, Latviya va Turkiya) ilmiy stajirovkalarga yuborildi. Bundan tashqari, 31 turdagi laboratoriya asbob-uskunalari xaridi bo‘yicha 19,4 milliard so‘m moliyalashtirildi.
Biroq ushbu ilmiy laboratoriya asbob-uskunalaridan foydalanish natijadorligini aniqlash maqsadida olib borilgan o‘rganishlarda ayrim ilmiy tadqiqot va OTMda ulardan foydalanmaslik holatlari aniqlandi.
Polimerlar kimyosi va fizikasi institutiga yetkazib berilgan “AR403” rusumli universal yuritgichli ko‘p maqsadli ilmiy laboratoriya asbob-uskunasi (92,0 ming AQSH dollari) ishlatilmayotgani maʼlum bo‘ldi.
Yana bir misol, Xorazm Maʼmun akademiyasiga yetkazib berilgan “SETARAM” rusumli ko‘p tarmoqli o‘ta sezgir differensial skanerlovchi kalorimetr ilmiy laboratoriya asbob-uskunasi (24,0 ming AQSH dollari) may oyidan buyon ishga tushirilmagan va hozirgi kunda muassasa omborxonasida saqlanmoqda.
Avvalroq Innovatsion rivojlanish vazirligining vazifalari belgilangani hamda Olmazor tumani innovatsion hududga aylantirilishi haqida maʼlumot xabar berilgandi.
Munojat Valiyeva
