Xalqaro media-xollda  “Yuksalish” harakati eʼlon qilgan tanlovlar g‘oliblari taqdirlandi

 

Joriy yilning 20 aprelida Xalqaro yodgorliklar va obidalar kuniga bag‘ishlab ijtimoiy tarmoqlarda fleshmob eʼlon qilindi. Fleshmobga qo‘shilish uchun ijtimoiy tarmoq foydalanuvchilari o‘z sahifalarida #ShaharsozlikTolqini #GradostroitelnayaVolna xeshteglaridan foydalangan holda O‘zbekistonning obidalari, tarixiy binolari muhrlangan surat va videolarni joylashtirishi lozim edi. O‘ziga xos “chellenj” doirasida O‘zbekistonning turli hududlaridan 60 dan ziyod tarixiy obyektlar  taqdim etildi.

 Hayʼat aʼzolari kelajak loyihalar uchun manzil bo‘la oladigan 3 ta obyektni tanlab oldi. Bular: Toshkent shahridagi Al-Xorazmiy maydoni, Samarqand shahridagi chashma, Navoiy viloyati Karmana tumanidagi Mirzachorbog‘ saroyi.

Obodonlashtirish uchun birinchi manzil sifatida poytaxtning Chilonzor tumanidagi Al-Xorazmiy maydoni tanlandi.

4 iyun kuni “Yuksalish” UMH, Toshkent shahar hokimligi qoshidagi jamoatchilik kengashi va O‘zbekiston ekologik qurilish kengashi bilan birgalikda Xorazmiy maydonini rekonstruksiya qilish bo‘yicha yosh arxitektor-dizaynerlar uchun tanlov eʼlon qilindi. Ishtirokchilardan maydonning o‘ziga xosligini va ekinlarini saqlab qolgan holda landshaft dizayni konsepsiyasini taklif qilish talab etilgan edi.

Mazkur tanlov natijalariga ko‘ra, Toshkentdagi Al-Xorazmiy maydonini qayta tiklash uchun o‘tkazilgan tanlovda “Insard Architects” arxitektura byurosi, “MADO” arxitektorlar guruhi hamda Mirakbar Jo‘rayev g‘olib deb topildi. G‘oliblarga sertifikat va pul mukofotlari topshirildi.

Shuningdek, tadbirda  O‘zbekiston mustaqilligining 30 yilligiga bag‘ishlangan #MenUchunQadrli fleshmob-tanlovi g‘oliblari ham taqdirlandi.  

 

Munojat Valiyeva