O‘zLiDeP Prezident sayloviga tayyorgarlik jarayoni yuzasidan hisobot berdi

 

Xalqaro Media-xollda Tadbirkorlar va ishbilarmonlar harakati – O‘zbekiston Liberal-demokratik partiyasi tomonidan tashkil etilgan brifingda ayni jihatlarga to‘xtalib o‘tildi.

 

Tadbirda partiyaning O‘zbekiston Respublikasi Prezidenti sayloviga tayyorgarlik jarayonlari va amalga oshirilgan ishlari xususida so‘z yuritildi.    

 

Qayd etilganidek, O‘zbekiston Respublikasi Prezidenti sayloviga partiyadan ko‘rsatilgan nomzodning Saylovoldi dasturi loyihasi ishlab chiqildi. Mazkur yo‘nalishda doimiy faoliyat olib boruvchi ishchi guruh tuzildi.  

 

Shu yilning aprel-may oylarida siyosiy partiyalarning mamlakatda amalga oshirilayotgan islohotlarga taʼsiri hamda aholining siyosiy jarayonlarga munosabati, fikr-mulohazalarini atroflicha o‘rganish maqsadida tuman (shahar)larda so‘rovlar o‘tkazildi va unda 30 mingga yaqin respondent qatnashdi.    

 

Shu tariqa bo‘lajak saylov oldidan aholining kayfiyati, ularning siyosiy jarayonlarga, xususan, partiya tomonidan amalga oshirilayotgan ishlarga munosabati o‘rganildi. Shuningdek, kelgusida partiya aholi orasiga yana-da chuqurroq kirib borish uchun o‘z ish uslubiga qanday o‘zgartishlarni kiritish kerakligi to‘g‘risida xulosalar chiqardi.    

 

Bundan tashqari, partiyadan Prezidentlikka ko‘rsatilgan nomzodning saylovoldi dasturi 7 ta tilda kitobcha shaklida chiqarilib, saylovchilar eʼtiboriga havola etildi. “Saylovoldi tashviqotiga oid tavsiyalar”, “Vakolatli vakil va kuzatuvchilar uchun eslatma” va boshqa shu singari qo‘llanma, yo‘riqnomalar ham chop etilib, tarqatildi.  

 

Shuningdek, ko‘zi ojiz saylovchilarga qulaylik yaratish maqsadida nomzodning saylovoldi dasturi maxsus brayl alifbosi hamda audioyozuv ko‘rinishida tayyorlanib, respublikadagi Ko‘zi ojizlar jamiyatlariga taqdim etildi.  

 

Masalan, partiya “Ayollar qanoti” tomonidan partiya markaziy saylovoldi shtabi negizida ayol saylovchilar bilan ish olib boruvchi guruh shakllantirildi. Rejaga asosan respublikaning barcha hududlarida “Prezident saylovida xotin-qizlarning faol ishtirokini taʼminlash masalalari” mavzuida turkum o‘quv-seminarlar, davra suhbatlari, uchrashuvlar tashkil etildi.    

 

Shuningdek, barcha tuman va shaharlarda turli targ‘ibot aksiyalari  hamda “O‘zLiDeP faoli — islohotlar targ‘ibotchisi!” klubi aʼzolari ishtirokida  “Biz taraqqiyot va yorqin kelajak uchun ovoz beramiz!” shiori ostida “Eshikma-eshik” aksiyasi, “Farovon hayot sari!” shiorlari ostida ochiq muloqotlar o‘tkazib kelinmoqda. Ayni paytda ijtimoiy tarmoqlarda chellenjlar amalga oshirilyapti.  

 

Partiyaning 1 milliondan ziyod aʼzosi bo‘lib, ularning yarmi, deyarli 500 mingdan ziyodi yoshlardir. Partiyamiz “Yoshlar qanoti” shu yil boshidan 30 ga yaqin mavzu va yo‘nalishda 4,5 mingdan ziyod tadbir o‘tkazdi. Saylovga start berilishi bilan har bir tumanda faol bo‘lgan yoshlardan iborat jami 3,5 mingga yaqin volontyor hamda 70 dan ziyod yoshlar parlamenti aʼzolaridan iborat Yosh saylovchilar va volontyorlar targ‘ibot guruhlari tuzildi. Hozirda targ‘ibot guruhlari joylarda mahallama-mahalla, uyma-uy yurib, targ‘ibot ishlarini olib bormoqda.  

 

Bahriniso Madumarova