Guvohi bo‘lyapmanki qishloq odamlari ham saylovga befarq emas— Navbahor Imomova
Xalqaro media-xolldagi tadbirlar doirasida zamon.uz taniqli jurnalist, “Amerika Ovozi” teleradiojurnalisti Navbahor Imomova bilan suhbat uyushtirdi.
— Saylov asli juda qiziq jarayon. Bu hatto erkin bo‘lmagan jamiyatlarda ham katta qiziqish uyg‘otadi. Nega? Chunki aynan saylov paytida barcha sergaklashadi. Siyosatga qiziqmaydiganlarda ham maʼlum bir darajada qiziqish paydo bo‘ladi.
2019 yilda parlament saylovlarini yoritish uchun kelganimda meni saylov kampaniyasining dinamikasi lol qoldirgan edi. O‘shanda partiyalar o‘rtasida chinakam kurash ketayotganini ko‘rganman. Siyosiy partiyalar bir-biridan ajralib turishini ko‘rsatishga harakat qilgan.
2019 yildan boshlab 2021 yilgi prezident saylovi bo‘yicha siyosatchilar, partiya liderlaridan so‘rab kelaman. Chunki bu yilgi prezident saylovi 2017 yilda boshlangan islohotlarning hisoboti, imtihoni bo‘ladi, degan fikrdaman.
Bu safargi saylov jarayonini yoritishni chekka hududlar aholisining fikrini o‘rganishdan boshladim. Bir o‘zgarishni ko‘rish mumkin – qishloq odamlari ham saylovga befarq emas. Aholi tizimdan ko‘p narsa kutyapti. Shu bilan birga ayrim kamchiliklarni ham kuzatish mumkin. Xususan, aholining ayrim qatlamlari hali ham barcha masalalar prezident tomonidan hal qilinishi kerak, degan fikrda. Shuningdek, bu galgi saylovda nomzodlarning avvalgi saylovlarga nisbatan faolligini ham kuzatish mumkin.
Avvalroq MSKda Turkiya kuzatuvchilari bilan uchrashuv bo‘lgani hamda O‘zLiDeP Prezident sayloviga tayyorgarlik jarayoni yuzasidan hisobot bergani xabar qilingandi.
Jahongir Qo'ziyev
