O‘zbekistonda hafta davomida qanday ob-havo kutilmoqda?
Bugun va ertaga O‘zbekiston bo‘yicha havo harorati 20-22 daraja issiq bo‘lgan quruq va iliq ob-havo saqlanib turadi. Hafta o‘rtasida ob-havo o‘zgaradi. Bu haqda “O‘zgidromet” xabar berdi.
Qayd etilishicha, 27-oktabrda respublika shimoliy hududlariga Kavkaz hududlari ustida shakllangan nam havo massalari kirib kelishi boshlanadi. Qoraqalpog‘istonda, Xorazm viloyatida biroz yomg‘ir yog‘ishi mumkin. Respublikaning qolgan hududlarida quruq ob-havo saqlanib turadi.
28-oktabrda yomg‘irli zona sharqqa siljiydi va respublikaning tog‘oldi hamda tog‘li hududlariga yaqinlashganda yog‘ingarchilik kuchayadi. Respublika bo‘yicha baʼzi joylarda yomg‘ir yog‘adi. Faqat Qoraqalpog‘istonda, Xorazm viloyatida va Farg‘ona vodiysida yog‘ingarchilik kutilmaydi.
29-oktabrda markaziy va sharqiy hududlarda, shuningdek tog‘oldi va tog‘li hududlarda yomg‘ir yog‘ishi kutilmoqda. 27-28 oktabrda respublika bo‘yicha baʼzi joylarda shamol tezligi 15-20 m/s gacha kuchayishi mumkin.
Taʼkidlanishicha, hafta davomida harorat kechalari 4-9 daraja iliq atrofida bo‘ladi, kunduz kunlari esa harorat asta-sekin pasayadi va hafta oxiriga borib kunduz kungi harorat 7-12 daraja iliqqacha pasayadi.
Eslatib o‘tamiz, bundan avval Gidrometeorologiya xizmati dam olish kunlari qanday ob-havo bo‘lishini maʼlum qilgandi.
