Endilikda ilmiy darajaga ega bo‘lgan muzey xodimlarining maoshi ko‘tariladi
Endi davlat muzeylari, muzey-qo‘riqxonalar, uy muzeylari va boshqa muzey turidagi tashkilotlarning maʼmuriy-boshqaruv xodimlari, ijodiy xodimlari va mutaxassislari ilmiy darajasiga qarab, bazaviy lavozim maoshlari miqdori oshiriladi.
Madaniyat vazirligining buyrug‘iga asosan davlat byudjetidan moliyalashtiriladigan davlat madaniyat muassasalari xodimlari mehnatiga haq to‘lash bo‘yicha bazaviy lavozim maoshlari miqdorlariga qo‘shimcha va o‘zgartirish kiritildi.
Qayd etilishicha, endi davlat muzeylari, muzey-qo‘riqxonalar, uy muzeylari va boshqa muzey turidagi tashkilotlarning maʼmuriy-boshqaruv xodimlari, ijodiy xodimlari va mutaxassislari ilmiy darajasiga qarab, bazaviy lavozim maoshlari miqdori oshiriladi.
Shuningdek, fan doktori ilmiy darajasiga yoki fan doktori (Doctor of Sciyence) yoki xorijiy davlatlarning ularga tenglashtirilgan boshqa ilmiy darajalarga ega bo‘lganlarga – 2,5 koeffitsiyentga oshirilgan holda belgilansa, fan nomzodi ilmiy darajasiga yoki falsafa doktori (ph.d) yoki xorijiy davlatlarning ularga tenglashtirilgan boshqa ilmiy darajalarga ega bo‘lganlarga – 2 koeffitsiyentga oshirilgan holda belgilanadi.
Maʼlumot uchun: davlat madaniyat muassasalari 2021-yil 1-yanvardan mehnatga haq to‘lash bo‘yicha bazaviy lavozim maoshlari miqdorlari o‘zgarganligini hisobga olib ish haqlarini qayta hisoblab to‘lanishini taʼminlash topshirilgandi.
Eslatib o‘tamiz, avvalroq madaniy meros agentligining vazifalari belgilangani hamda 2022-yilda Osiyo va Tinch okeani muzeyi Markaziy Osiyo keramika ekspozitsiyasini ochishi haqida xabar berilgandi.
Cho‘lponoy Ahmedova
