Lukashenko Polshani ogohlantirdi

 

Belarus prezidenti Aleksandr Lukashenko Minsk va Moskva mamlakat g‘arbiy chegaralarida militarizatsiya kuchayishiga qarshi qatʼiy harakat qilishini maʼlum qildi. Bu haqda “BelTA” agentligi xabar berdi.

 

“Polyaklar Belarus bilan chegaradagi noqonuniy migratsiyaga qarshi “Leopard” tanklari bilan kurashmoqchi. Siz bunga qarshi bo‘lishingiz mumkin. Ammo oddiy odamlarga qarshi tanklar bilan qanday qilib kurash olib borish mumkinligini tushunolmayman. Ularga bu bir bahona, asl maqsad esa  o‘z qo‘shinlarini bizning chegaraga yaqinlashtirishdir. Eʼtibor bering – ittifoqchi davlat chegarasiga (Rossiya va Belarus)”, – degan Lukashenko.

 

U bu fikrlarni Rossiya bosh prokurori Igor Krasnov bilan uchrashuv paytida bildirgan.Belarus rahbari hukumat barchasini ochiq-oydin ko‘rib turganini taʼkidladi.

 

“Tabiiyki, biz qatʼiy munosabat bildiramiz. Biroz kutib turib, ularni ogohlantiramiz. Bizda, ayniqsa, Rossiyada ham chegaraga yaqinlashtiradigan yetarli vositalar bor. Bu yerda hech qanday tanqidlarga qaramasdan qatʼiylik bilan  harakat qilamiz”, – deb qo‘shimcha qilgan Lukashenko.

 

Bundan avval Lukashenko odamlarni vaksina olishga majburlay olmasligini aytgandi. Shuningdek, vaziyat taqozo qilsa, Belarus va Rossiya yagona harbiy bazaga aylanishi xabar qilingan edi.

 

Jahongir Qo'ziyev