Evakuatsiya OAVda ko‘rsatilgandan ko‘ra dahshatliroq bo‘ldi — afg‘onistonlik qochqin hikoyasi

 

Afg‘onistonlik ingliz tili o‘qituvchisi Afg‘onistondan evakuatsiya qilinishi tarixini gapirib berdi. U bilan “Ria Novosti” suhbat uyushtirdi.

 

Nashr suhbatdoshi o‘z ismini oshkor qilmagan. Uning so‘zlariga ko‘ra, ko‘plab afg‘onlar AQSH Kobul aeroportidan istalgan shaxs evakuatsiya qilinayotganini eshitib, shaxsni tasdiqlovchi hujjat o‘rniga, elektr energiyasiga qilingan to‘lov hisob raqamlarini olib kelgan. Uning o‘zi esa, xotini va bolalarini tashlab, AQSH ga ketishga majbur bo‘lganini maʼlum qildi.

 

“Men boshqalarning velosipedlarini rasmga olib bolalarimga jo‘natman va ularga sotib olganimni aytaman. Bunday qilishimga sabab – ularda umidni so‘ndirmaslik. Oilamni bu yerga olib kelish uchun istalgan shaxs bilan gaplashishga tayyorman. Aks holda Afg‘onistonga qaytib ketaman”, – degan afg‘on.

 

U AQSH harbiylariga evakuatsiya uchun minnatdorlik bildirdi, ammo jarayon o‘ta dahshatli bo‘lganini taʼkidladi. “Bu dahshat edi, ishonish qiyin. Men hech qachon bunday bo‘ladi deb o‘ylamagandim. Evakuatsiya OAVda ko‘rsatilgandan ko‘ra dahshatliroq bo‘ldi”, – deb qo‘shimcha qilgan u. Qochqinning so‘zlariga ko‘ra, kimdir AQSH hammani evakuatsiya qilishi haqida yolg‘on maʼlumot tarqatgan. Shundan keyin minglab odamlar aeroportga intila boshlagan va vaziyat butunlay nazoratdan chiqib ketgan.

 

U ko‘pchilikning qo‘lida zarur hujjatlar yo‘q bo‘lganini, aksariyat odamlar elektr energiyasiga qilingan to‘lov to‘g‘risida qog‘oz va Amerikada ishlab chiqarilgan pechenye qutilarini ko‘rsatib, aeroportga kirishga harakat qilganini maʼlum qildi.

 

O‘zining evakuatsiya qilinishi tarixini so‘zlab berar ekan, afg‘on aeroportga kelganda otishma boshlanganini, shu sababli oilasini tashlab ketishga majbur bo‘lganini taʼkidlagan. Uning rafiqasi erkakning o‘zi ketishiga rozilik bildirgan, u esa imkoniyat tug‘ilishi bilan oilasini AQSH ga olib ketishga vaʼda bergan. Aeroportda ekanligida qochqin ko‘plab dahshatli hodisalarga guvoh bo‘lgan.

 

“Ko‘pchilik birinchi marta samolyotni ko‘rishi edi. Shu sababli ular toliblar qo‘lida qolgandan ko‘ra, samolyotga osilib bo‘lsa ham Afg‘onistonni tark etishni afzal ko‘rdi”, – dedi u.

 

Uni Filadelfiya shtatiga olib kelishgan va keyinchalik harbiy bazalardan biriga jo‘natishgan.

 

Maʼlumot o‘rnida: Afg‘onistonda 15 avgust kuni hokimiyat toliblar qo‘liga o‘tdi. Shundan keyin AQSH va G‘arb davlatlari  fuqarolari va ular bilan hamkorlik qilgan afg‘onistonliklar evakuatsiya qilindi. So‘nggi maʼlumotlarga ko‘ra, AQSHga 55 ming afg‘onlar olib kelingan.

 

Bundan avval AQSHning Afg‘onistondagi ishtirokiga oid ko‘plab maʼlumotlarni olish cheklab qo‘yilgani to'g'risida xabar berilgandi. Shuningdek, afg‘onistonlik qochqin qiz AQSH bazasidagi hayotini so‘zlab bergandi.

 

Jahongir Qo'ziyev