O‘zbekiston va Rossiya temiryo‘lchilari transafg‘on temiryo‘li bo‘yicha hamkorlikda ish boshladi
“O‘zbekiston temir yo‘llari” va "Rossiya temir yo‘llari" kompaniyalari transafg‘on temiryo‘li bo‘yicha hamkorlikdagi ishni boshladi.
Bu haqda “Sputnik Afganistan” xabar berdi.
Ikki tomonlama kelishuvga ko‘ra, “Termiz-Mozori Sharif – Kobul – Peshovar” temiryo‘li bo‘yicha texnik va kartografik maʼlumotlar almashiladi.
Shuningdek, temiryo‘lning afg‘on uchastkasidagi har bir o‘tkazish punkti yillik o‘tkazish quvvati o‘rganib chiqilishi belgilandi. Shuningdek, tez kunlarda O‘zbekiston, Afg‘oniston va Rossiya temiryo‘l rahbariyati o‘rtasida muzokara o‘tkazilishiga kelishib olindi.
Maʼlumot o‘rnida: temiryo‘l loyihasi umumiy qiymati 5 milliard dollarni tashkil etadi. Uning tranzit quvvati yiliga 20 million tonna. Temiryo‘l Markaziy va Janubiy Osiyoni bog‘lovchi asosiy transport yo‘lagi bo‘ladi.
Bundan avval Termizda "Tolibon" bilan muzokaralar o‘tkazilgani va unda temiryo‘l masalasi ko‘tarilgani xabar qilingandi.
