Olmaotada o‘g‘il bolalar yubkalarda darsga keldi. Nega?
Olmaotada nufuzli Nazarboyev intellektual maktabining (NIM) o‘g‘il bolalari maʼmuriyatning kiyim-kechakka bo‘lgan munosabatiga norozilik bildirish uchun yubkalarda darslarga keldi.
Maʼlum bo‘lishicha, 27 oktyabr kuni ushbu maktabning 8-sinf o‘quvchisi o‘z joniga qasd qilgan. Bunga sabab, bola Garri Potter kitoblariga bag‘ishlangan maktab baliga yubkada kelgan. Unga kirishga ruxsat berilmagan va maktab psixologiga yuborilgan.
Maktabdagi sinf rahbari bolakayni yubkada kelgani uchun kuzgi balga kiritmadi.
O‘quvchining sinfdoshi o‘z ijtimoiy tarmoqdagi sahifasida
sinf rahbarimiz uni va u tomonida bo‘lganlarni majburan maktab psixologiga olib bordi, “gunohkorni” qo‘llab-quvvatlashga jurʼat etgani uchun bizga intizomiy jazo qo‘llash bilan tahdid qilgan
mazmunida post qoldirgan. Maktab o‘quvchilarining fikricha, ularning do‘sti bosimga dosh berolmay, o‘z joniga qasd qilgan.
Ushbu o‘quvchining o‘z joniga qasd qilganini “KazTAG” agentligiga Olmaota va maktab maʼmuriyati tasdiqlagan. Politsiya hodisa yuzasidan o‘z joniga qasd qilish moddasi bo‘yicha tergovga qadar tekshiruv boshladi.
Qayd etilishicha, sakkizinchi sinf o‘quvchisi hazil tariqasida bazmga yubka kiyib kelgan.
Eslatib o‘tamiz, bundan avval Sankt-Peterburglik fuqaroga sobor fonida yarim yalang‘och suratga tushgani uchun jinoiy ish ochilgani haqida xabar berilgandi.
Cho‘lponoy Ahmedova
