Jiddiy inqiroz yaqinlashmoqda — Dmitriy Medvedev
RF sobiq bosh vaziri bunga nima sabab bo‘lishini maʼlum qilgan.
Rossiya sobiq bosh vaziri, RF xavfsizlik kengashi raisi o‘rinbosari Dmitriy Medvedevning fikricha, dunyoda oziq-ovqat yetishmovchiligi bilan bog‘liq jiddiy inqiroz boshlanmoqda. Bu haqda Medvedevning "Novaya gazeta" nashrida eʼlon qilingan maqolasida so‘z boradi.
"Ochiq ko‘rinib turibdi — dunyoda oziq-ovqat yetishmovchiligi bilan bog‘liq inqiroz boshlanmoqda. Ularning narxi hamma joyda ko‘tarilmoqda, inflyatsiya tezlashmoqda" — deya qayd etgan siyosatchi.
Shuningdek, Medvedev jahon iqtisodiyotining hozirgi holati 2008-2009 yillardagi moliyaviy inqiroz davridagidan ham jiddiy ekaniga eʼtibor qaratdi. Uning fikricha, hozirgi iqtisodiy inqiroz asosan rivojlangan va yuqori darajada globallashgan davlatlar iqtisodiyotiga kuchli zarba bergan. Shu bilan birga aynan shu davlatlar tezroq tiklanish imkoniyatini namoyish qilmoqda.
Xususan, Iqtisodiy hamkorlik va taraqqiyot tashkiloti maʼlumotlariga ko‘ra, aksariyat rivojlangan davlatlar iqtisodiyoti 2022 yil oxiriga kelib inqirozgacha bo‘lgan holatiga qaytadi. Ayrim rivojlanayotgan mamlakatlarda esa bu 2024 yilga kelib yuz berishi kutilmoqda. Medvedevning fikricha, global tushkunlik oqibatlarini bartaraf etish uchun samarali siyosat yuritish kerak.
“Hozirning o‘zida ayrim davlatlarning tashqi qarzi misli ko‘rilmagan darajada oshib ketgan. Inflyatsiyaning o‘sishi yangi tahdidga aylandi. Iqtisodiyot tiklanishi, shuningdek, tashqi savdo aylanmasiga bog‘liq. Aniq prognozlarni oldindan aytish qiyin.
Shu bilan birga eng katta to‘siqlar siyosiy xarakterdagi omillardir. Ulardan biri – koronavirusga qarshi kurash bo‘yicha xalqaro hamkorlik. Ammo ko‘pchilik davlatlarda bu borada siyosiy iroda ko‘rsatilmayapti. Bu hozirda eng katta muammolardan biri”, – degan Medvedev.
Avvalroq Vladimir Putin Ukraina haqida maqola yozgani hamda CNBC kanaliga katta intervyu bergani xabar qilingandi.
Jahongir Qo'ziyev
