Uzum ostiga yashirilgan katta miqdordagi giyohvand moddalar aniqlandi
Toshkent viloyatida 156 kg.ga yaqin yirik miqdorda giyohvandlik vositalarini mamlakatimizga olib kirishga bo‘lgan urinish fosh etildi.
Bu haqda Davlat bojxona qo‘mitasi matbuot rahbari Nurbek Salomov zamon.uz ga maʼlum qildi. Boshqaruvidagi “DAF” rusumli avtomashina o‘rnatilgan tartibda bojxona ko‘rigidan o‘tkazildi. Hujjatlarga ko‘ra, uzum ortilgan avtomashina respublikamiz hududidan tranzit tarzida o‘tib, Rossiya Federatsiyasiga yetib borishi lozim edi.
Shubha ostiga olingan yuk avtotransport vositasi tezkor tuzilmalarning maxsus kuzatuvi ostida, “Yangiyo‘l” bojxona postida o‘rnatilgan tartibda ko‘zdan kechirildi.
Transportga ortilgan uzumlar tushirilgach, tirkamaning pol qismi ochib ko‘rildi. Bojxona xodimlarining ko‘zini shamg‘alat qilish maqsadida polda yashirin bo‘lmalar hosil qilinib, ular orasiga esa yashil rangli yelim idishlar poliuretan ko‘pik ko‘magida zichlab joylashtirilgani maʼlum bo‘ldi.
Uddaburonlik bilan joylashtirilgan 141 dona yelim idishlarda, idishi bilan hisoblaganda jami 156 kg.ga yaqin giyohvandlik vositalari borligi aniqlandi.
Idishlardagi giyohvandlik vositalarining hidini xizmat itlari payqamasligi uchun idish qopqog‘i maxsus smola - qatron ko‘magida ishlov berilganligi maʼlum bo‘ldi.
O‘tkazilgan tezkor tadbir davomida 149,76 kg. “gashish”, 4,44 kg. “opiy” va 1,52 kg. “geroin” giyohvandlik vositalari ashyoviy dalil sifatida olindi.
Hozirda mazkur holat yuzasidan bojxona organlari tomonidan jinoyat ishi qo‘zg‘atildi.
Avvalroq, Yakkasaroyda o‘tkazilgan tungi reydda “Lacetti” salonidan giyohvandlik moddasi topilgani hamda Surxondaryolik haydovchi O‘zbekistonga 97 kilo giyohvandlik vositalarini olib kirishga uringani haqida xabar bergandik.
Munojat Valiyeva
