O‘zbekistonda ilk marta aholidan elektr energiyasi sotib olina boshlandi
Ushbu stansiya orqali yiliga 7 000 dan 10 000 kVt.soatgacha elektr energiyasi ishlab chiqariladi.
Toshkent shahrining Yakkasaroy tumanida istiqomat qiluvchi Rahimjon Rasulov xonadonida 6 kVt. quvvatli kichik quyosh foto elektr stansiyasi o‘rnatib, ushbu stansiya orqali ishlab chiqarilgan elektr energiyasining o‘z ehtiyojidan ortgan qismini hududiy elektr tarmoqlari korxonasiga sotishni boshladi. Shuningdek, mazkur xonadon egasi va Energetika vazirligi tizimidagi Toshkent shahar elektr tarmoqlari korxonasi o‘rtasida "Qayta tiklanuvchi energiya manbalarining kichik obyektlaridan ishlab chiqarilgan elektr energiyasini sotib olish to‘g‘risida” shartnoma imzolandi.
Bu xonadonda ishlab chiqarilgan elektr energiyasi hududiy elektr taʼminoti korxonasi tomonidan kafolatlangan tarzda sotib olinadi.
Shartnoma umumiy o‘rnatilgan quvvati 1 MVt.gacha (o‘zgaruvchan tok) bo‘lgan qayta tiklanuvchi energiya manbalari obyektlaridan, (mikro va kichik gidroelektr stansiyalardan tashqari) elektr eneriyasini xarid qilishga taalluqlidir.
Maʼlumot o‘rnida: amaliyot Vazirlar Mahkamasining qarori bilan tasdiqlangan “Elektr energiyasi, shu jumladan, energiyaning qayta tiklanadigan manbalaridan elektr energiyasi ishlab chiqaradigan tadbirkorlik subektlarini yagona elektr energetika tizimiga ulash reglamenti”ga asosan amalga oshiriladi.
Shaxsiy quyosh fotoelektr stansiyalarini (1 MVt.gacha) o‘rnatish istagida bo‘lgan fuqarolar stansiyalarini yagona energetika tizimiga ulangan holda foydalanishlari hamda o‘z ehtiyojidan ortgan qismini hududiy elektr tarmoqlari korxonalariga yuqoridagi qarorlarga asosan shartnoma asosida sotishi mumkin.
Eslatib o‘tamiz, bundan avval Surxondaryoda elektr stansiyalar qurilishi va Navoiyda quyosh stansiyasi ishga tushirilishi 80 million kub metr gazni iqtisod qilish imkonini berishii haqida xabar berilgandi.
Cho‘lponoy Ahmedova tayyorladi
