1 noyabrdan I va II guruh nogironligi bo‘lgan fuqarolarga ayrim davlat xizmatlarini ko‘rsatish bo‘yicha 50 foizlik chegirma belgilandi
Davlat xizmatlarini ko‘rsatishda 60 ga yaqin hujjatlarda belgilangan to‘lovlar bo‘yicha 50 foiz miqdorida chegirma qo‘llaniladi.
Shu yilning 1 noyabridan boshlab, “Ijtimoiy himoya yagona reyestri” axborot tizimida ro‘yxatga olingan shaxslarga, shuningdek, I va II guruh nogironligi bo‘lgan fuqarolarga 56 turdagi davlat xizmatlarini ko‘rsatish bo‘yicha 50 foizlik chegirma belgilandi. Shuningdek, Yagona interaktiv davlat xizmatlari portali (YAIDXP) orqali ro‘yxatda keltirilgan davlat xizmatlarini ko‘rsatishda ham qonunchilik hujjatlarida belgilangan davlat bojlari, yig‘imlar va boshqa har qanday to‘lovlarga 50 foiz miqdorida chegirma qo‘llaniladi.
Imtiyozga ega bo‘lgan shaxslarni aniqlash O‘zbekiston Respublikasi Tibbiy-ijtimoiy xizmatlarni rivojlantirish agentligi axborot tizimidan real vaqt rejimida avtomatik tarzda amalga oshiriladi.
Shu bilan birga, chegirma belgilangan hujjatlar orasida Nikoh qayd etganligi, nikohda turmasligi yoki nikohdan ajralganligi to‘g‘risidagi maʼlumotnomani olish, sudlanmaganlik (yoki sudlanganlik) to‘g‘risida maʼlumotnomalarni olish uchun ariza, pasportni ID kartaga almashtirish uchun ariza yuborish, tovar belgisini arizachi nomiga ro‘yxatdan o‘tkazish uchun ariza yuborish kabi xizmatlar mavjud.
Eslatib o‘tamiz, bundan avval aholining davlat xizmatlaridan foydalanish imkoniyatlari kengaytirilgani haqida xabar berilgandi.
Cho‘lponoy Ahmedova
