Navoiyda Rossiya aviakompaniyasi yo‘q reysga bilet sotdi
Holat yuzasidan Uzbekistan Airports izoh berdi.
Qayd etilishicha, kecha, 8 noyabr kuni tushdan keyin Rossiyaning IFly aviakompaniyasi tomonidan Navoiy — Moskva va Navoiy — Sankt — Peterburg yo‘nalishlari bo‘yicha parvoz qilish niyatida 200 nafar yo‘lovchi Navoiy xalqaro aeroportiga kelgan. Biroq bu reyslar jadvalda bo‘lmagan.
Yo‘lovchilarning so‘zlariga ko‘ra, ular aviachiptalarni "Vostok Buxoro" kompaniyasining Samarqand, Buxoro va Urganch shaharlarida joylashgan turli filiallaridan xarid qilgan.
Navoiy aeroporti xodimlari chiptalarni sotgan kompaniya bilan bog‘lanib, yo‘lovchilarga kerakli maʼlumotlarni yetkazishni va vaziyatni bartaraf etishni talab qilgan. Kompaniya vakillari barcha yo‘lovchilarga chipta pullari qaytarilishini maʼlum qilgan.
Eslatib o‘tamiz, avvalroq Toshkent aeroportida 200 ga yaqin yo‘lovchi Istanbulga ucha olmagandi. Shuningdek, Islomoboddan Londonga uchayotgan samolyot yo‘lovchi ayolning o‘limi tufayli Toshkentga favqulodda qo‘ngani hamda u o‘z yo‘lovchilarini olib ketgani haqida xabar berilgandi.
