To‘xtovsiz urush Suriya sanoatiga qancha zarar keltirgani maʼlum qilindi
Shuningdek, ko‘plab korxonalar atayin vayron qilingani aytildi.
Suriya sanoati mamlakatda to‘xtovsiz davom etayotgan urush oqibatida 23.5 milliard dollar zarar ko‘rgani maʼlum bo‘ldi. Bu haqda Suriya sanoat vaziri Ziyod Sabbog‘ “RIA Novosti”ga bergan intervyusida aytib o‘tgan.
“Xususiy va davlat sektoridagi sanoatga yetkazilgan zarar 2019 yil oxirida 23.55 milliard dollarni tashkil etdi”, – degan vazir.
Uning so‘zlariga ko‘ra, eng katta zarar neft sanoatiga yetkazilgan. Shuningdek, strategik ahamiyatga ega bo‘lgan oziq-ovqat va dori-darmon ishlab chiqaruvchi obyektlar atayin vayron qilinganligi taʼkidlandi.
Sabbog‘ Xalab viloyatidagi tekstil korxonalari ham jiddiy zarar ko‘rganini maʼlum qilgan. U yerda terrorchilar davlat va xususiy sektorga qarashli fabrikalarni talon-taroj etgan.
Maʼlumot o‘rnida: Suriyada 2011-yildan beri urush davom etmoqda.
Avvalroq Turkiya Suriya shimolidagi kurdlarga qarshi hujum boshlashi mumkinligi haqida xabar qilingandi.
Jahongir Qo'ziyev
