Prezident Shavkat Mirziyoyev YUNESKO Bosh direktori Odri Azulega maktub yo‘lladi
Davlatimiz rahbari Odri Azulega uning YUNESKO Bosh direktori lavozimiga qayta saylangani munosabati bilan samimiy tabriklari va eng ezgu tilaklarini bildirdi.
"Nomzodingiz keng qo‘llab-quvvatlangani tinchlikni taʼminlash va Barqaror rivojlanish maqsadlariga erishish borasidagi faol saʼy-harakatlaringiz va Tashkilotingiz qo‘shayotgan katta hissaning navbatdagi tasdig‘i bo‘ldi.
Sizning ushbu lavozimdagi muvaffaqiyatli va natijador faoliyatingiz, Siz tomondan ilgari surilayotgan muhim tashabbuslar va gumanitar loyihalar pandemiya davrida YUNESKOning muvofiqlashtiruvchi sifatidagi o‘rni mustahkamlanishi va xalqaro nufuzi yuksalishiga xizmat qildi", deyiladi, jumladan, maktubda.
Mamlakatimiz yetakchisi O‘zbekiston va YUNESKO o‘rtasidagi yaqin va ko‘p qirrali munosabatlarni kengaytirishga YUNESKO Bosh direktori tomonidan alohida eʼtibor qaratilayotganini yuksak qadrlashini taʼkidladi.
"Ochiq va sermahsul uchrashuvlarimiz sherikligimizning salohiyatini ro‘yobga chiqarish va keng qamrovli mamlakat dasturini amalga oshirishga kirishishga imkon bergani haqidagi fikringizga to‘liq qo‘shilaman.
Sizning ko‘magingiz bilan "Xiva jarayoni" - Tashkilot faoliyatining butun kun tartibi bo‘yicha Markaziy Osiyoda xalqaro hamkorlikning yangi platformasi ishga tushirildi. Ushbu tashabbus mintaqamizda YUNESKO bilan amaliy hamkorlikning kengayishi va muhim vazifalarning ilgari surilishiga xizmat qilishi shubhasiz", deyiladi maktubda.
Maktub yakunida davlatimiz rahbari uning O‘zbekiston Respublikasi Prezidenti lavozimiga qayta saylangani munosabati bilan yo‘llangan tabrik va iliq tilaklar uchun Odri Azulega minnatdorlik bildirib, unga mustahkam sog‘lik va olijanob faoliyatiga katta muvaffaqiyatlar tiladi.
