Yevroittifoq muhojirlarga 3,5 million yevro ajratdi
Mablag‘ Polsha-Belorus chegarasidan uyiga qaytishni istaganlarga beriladi.
Yevropa Ittifoqi Belarusdan o‘z vataniga qaytishni xohlovchi muhojirlarga yordam berish uchun 3,5 million yevroga yaqin mablag‘ ajratishga kelishib oldi. Bu haqda Yevrokomissiya rahbari Ursula fon der Leyen Yevroparlament deputatlari oldida so‘zlagan nutqida maʼlum qildi.
"Borgan sari ko‘proq muhojirlar tuzoqqa tushib qolgan va biz ularning vataniga qaytishini osonlashtirish uchun BMT agentliklari bilan ishlaymiz. Belarusdan ixtiyoriy qaytishni qo‘llab-quvvatlash uchun 3,5 million yevrogacha mablag‘ ajratamiz", - dedi u.
Bundan tashqari, Yevropa Komissiyasi rahbarining qo‘shimcha qilishicha, Litva, Latviya va Polshaga 2021 va 2022 yillar uchun chegaralarni mustahkamlash uchun ajratilgan mablag‘lar uch barobarga oshiriladi.
Eslatib o‘tamiz, Yevropa Ittifoqida odamlarni noqonuniy olib o‘tishga ko‘maklashuvchi yoki shug‘ullanuvchi transport operatorlariga nisbatan sanksiyalar qo‘llash taklif qilingan. Avvalroq Turkiya Yaman, Iroq va Suriya fuqarolariga Belorusga chipta sotishni taqiqlagandi.
Nasiba To‘xtayeva
