So‘nggi 10 oyda gaz balloni o‘rnatilgan avtomobillarning 17 tasi yonib ketgan

 

Statistik maʼlumotlarga ko‘ra 2020-yil va joriy yilning 10 oyi davomida respublika bo‘yicha gaz ballonlari o‘rnatilgan transport vositalarida 17 ta portlash holati sodir bo‘lgan. Shularning biri Farg‘ona viloyatining Quva tumanida bo'lgan.

 

Mutaxasislarning aytishicha, aksariyat hollarda gaz ballonlarni belgilangan tartibda texnik sinovdan o‘tkazmaslik, jismonan va maʼnan eskirgan gaz ballonlaridan foydalanish hamda avtomobillarga gaz to‘ldirish kompressor shoxobchalarida shu kabi gaz ballonlariga hamda meʼyordan ortiq bosimda gaz to‘ldirish sabab bo‘lmoqda.

 

Farg‘onada Oliy Majlisi Senatining Mudofaa va xavfsizlik masalalari qo‘mitasi hamda viloyat hokimligi hamkorligida o‘tkazilgan videoselektor yig‘ilishida gaz ballonlari o‘rnatilgan avtotransportdan egalari xavfsiz foydalanish qoidalari to‘g‘risida tushunchaga ega emasliklari, bundan tashqari, gaz ballonlarini avtomobillarga o‘rnatish va tegishli uskunalarni sinovdan o‘tkazish bilan shug‘ullanuvchi xo‘jalik yurituvchi subyektlar faoliyati ustidan taʼsirchan nazoratning o‘rnatilmagani ham noxush holatlarni yuzaga keltirmoqdaligi maʼlum qilindi.

 

Senatning Mudofaa va xavfsizlik masalalari qo‘mitasi raisi Qutbiddin Burxanovning maʼlumotlariga ko‘ra, bugungi kunda Farg‘ona viloyatida jismoniy shaxslarga tegishli 341 ming 820 ta avtotransport vositasining 249 ming 664 tasi, yaʼni 73 foizi va 31 ming 814 ta yuk tashish uchun mo‘ljallangan transport vositalarining 29 ming 214 tasi, yaʼni 91,7 foizi gaz ballonlari bilan jihozlangan.

 

Bu kabi holatlarni oldini olish borasida amalga oshirilishi lozim bo‘lgan vazifalar muhokama qilindi. Mutasaddilarga ko‘rsatma va topshiriqlar berildi.

 

Avvalroq Qashqadaryoda “Lacetti”ning gaz balloni portlagani, Qashqadaryoda yurib ketayotgan "Nexia" yonib ketgani hamda Navoiyda gaz quyish shoxobchasi portlab ketgani haqida xabar berilgandi. 

 

Munojat Valiyeva