Davlatimiz rahbari Ashxobodga yetib keldi
O‘zbekiston Respublikasi Prezidenti Shavkat Mirziyoyev Iqtisodiy hamkorlik tashkiloti sammitida ishtirok etish uchun Ashxobod shahriga keldi.
Davlatimiz rahbarini Turkmaniston Prezidenti Gurbanguli Berdimuhammedov poytaxt aeroportida kutib oldi. Shundan so‘ng mamlakatlarimiz yetakchilari muzokara o‘tkazdilar.
Suhbat avvalida O‘zbekiston Prezidenti Turkmaniston rahbari va birodar turkman xalqini yaqinlashib kelayotgan milliy bayram – Betaraflik kuni bilan samimiy qutladi.
Davlat rahbarlari ikki tomonlama yaxshi qo‘shnichilik va strategik sheriklik munosabatlarini rivojlantirishning dolzarb masalalari muhokama qilishdi.
Uchrashuvda joriy yil oktyabr oyida oliy darajada erishilgan kelishuvlarga muvofiq savdo-iqtisodiy hamkorlik borasidagi qo‘shma loyihalarni ilgari surishga alohida eʼtibor qaratildi.
Shuningdek, Xalqaro kun tartibi va ko‘p tomonlama tuzilmalar doirasidagi hamkorlik yuzasidan fikr almashildi. O‘zbekiston Prezidenti Turkmanistonning IHTdagi sermahsul raisligini yuksak baholadi va Ashxobod sammiti muvaffaqiyatli o‘tishini tiladi.
So‘ng tantanali kutib olish marosimi bo‘ldi. Davlat rahbarlari faxriy qorovul safi oldidan o‘tdilar.
Maʼlumot uchun, Tadbir kun tartibidan tashkilot doirasida ustuvor yo‘nalishlar bo‘yicha ko‘p qirrali hamkorlikni yana-da kengaytirish masalalari o‘rin olgan.
Turkmaniston poytaxtida davlatimiz rahbari qator ikki tomonlama uchrashuvlar ham o‘tkazadi.
